Premyer Liqa klubları kimi fəaliyyət göstərən “Dinamo”: “Kiçik maliyyə dəstəyi olarsa...”

“Düşünürəm ki, çempionatın sonunda hər şey istədiyimiz kimi olacaq, hər hansı radikal qərarlar qəbul etməyə ehtiyac qalmayacaq. Sadəcə, komandaya və məşqçi heyətinə inanmaq lazımdır. İnam varsa, istək varsa, xarakter ortaya qoymaqla uğur qazanmaq mümkündür. Həyatda qeyri-mümkün heç nə yoxdur. Əsas odur ki, özünə və komandana inanasan”.

Futbolxeber.az saytının məlumatına görə, bu sözləri futbolinfo.az-a açıqlamasında II Liqada mübarizə aparan “Dinamo”nun prezidenti Yaşar Seyidov söyləyib.

Seyidov uzunmüddətli fasilədən sonra “Kür-Araz” üzərində qazandıqları 4:2 hesablı qələbədən danışıb: “Komandamızın qış fasiləsindən sonra “Kür-Araz” üzərindəki qələbəsi psixoloji baxımdan böyük əhəmiyyət daşıdı. Bu nəticə gələcək oyunlarımız üçün motivasiya olacaq. Gənc və təcrübəli futbolçuların birliyi, bir-birini başa düşməsi komandanın uğur qazanması üçün vacibdir. Bunun dönüş olub-olmadığını tam olaraq gələcək oyunlardan sonra biləcəyik”.

Prezident çempionata yaxşı hazırlaşdıqlarını, lakin əsas heyətin bir hissəsinin maliyyə çətinlikləri səbəbindən digər komandalarına keçdiyini də bildirib: “Çempionatın başlamasına bir gün qalmış əsas heyətin 7 futbolçusu bizdən ayrıldı. Qısa zamanda U-19 komandamızdan təcrübəsi az olan gəncləri əsas heyətə dəvət etdik. Onların komandaya uyğunlaşması üçün müəyyən vaxt lazım idi. Əgər 7 futbolcumuz qalsaydılar, bu gün “Dinamo” turnir cədvəlində daha yuxarı pillədə olmalı idi”.

Yaşar bəy çempionatın əvvəlində müdafiənin zəifliyinin komandanı çətinə saldığını, lakin hazırda vəziyyətin dəyişdiyini də vurğulayıb: “Qış fasiləsində komandamızdan 3 futbolçu – Əkbər Cəfərzadə, Aqşin Abdullayev və Məhəmməd Cəfərzadə – həqiqi hərbi xidmətə gedib. Onların əvəzinə U-19 komandamızdan Ruslan Hüseynov, Nicat Nəsirli, Xəzər Əmiraslanov, Rəsul Məmmədli və Rəfael Eyvazov əsas heyətə dəvət olunublar. Bu futbolçular həm U-19, həm də əsas komandamızda oynayırlar. Bu dəyişikliklərin nəticəsini bir neçə turdan sonra dəqiq biləcəyik. Düşünürəm ki, daha çevik və baxımlı futbol oynayan bir komanda görəcəyik. Çempionatın əvvəlində müdafiəmizin zəifliyi səbəbindən lazımsız qollar buraxmışdıq. Lakin artıq belə olacağını düşünmürəm. Çünki komandamıza dəvət etdiyimiz Raul Musayev və Əli Abbasov, həmçinin çempionatın əvvəlində komandadan ayrılmış Ziya Məmmədlinin geri qayıtması ilk turdakı qələbədə böyük rol oynadı”.

Seyidov komandanın gələcəyi üçün ciddi strategiyası olduğunu da vurğulayıb: “İllərin təcrübəli funksioneri kimi qeyd etməliyəm ki, komandamız II Liqada oynasa da, Premyer Liqa klubları kimi bütün yaş qrupları ilə AFFA-nın təşkilatçılığı ilə keçirilən U-10, 11, 12, 13, 14, 15, 16, 17 və U-19 Gənclər Liqasında iştirak edir. Hazırda Bakı və ətraf kənd-qəsəbələrdən 300-dək gənc akademiyamızda futbolun sirlərini öyrənir. Kiçik maliyyə dəstəyi olarsa, qısa zamanda böyük işlər görməyi hədəfləmişik. Əsas məqsədimiz ilk altılığa düşmək və bacardıqca turnir cədvəlində yuxarı pillədə olmaqdır. Müəyyən uğurlar qazanmaq üçün çalışacağıq. Düzdür, çətindir, amma inanıram ki, qarşıya qoyduğumuz işlərin öhdəsindən gələ biləcəyik”.