Rayan Senhadji: “Qarşıdakı 3 tur “Sumqayıt” üçün çox vacibdir”

“Sumqayıt”ın müdafiəçisi Rayan Senhadjinin Futbolxeber.az saytına müsahibəsi

- Azərbaycan Premyer Liqasının son turunda “Qəbələ” ilə görüşdə heç-heçə oynadınız (0:0). Qarşılaşma ilə bağlı nə deyə bilərsiniz?

- Çətin oyun alındı. Rəqib zəif deyildi. Qol vurmaq üçün yaxşı şanslarımız var idi. Təəssüf ki, onlardan yararlana bilmədik. Rəqib müdafiədə diqqətli oynadı. Heyif ki, 2 xal itirdik. Halbuki qələbə bizim üçün çox vacib idi.

- Qol epizodlarını dəyərləndirməyinizə nə mane oldu?

- Standart vəziyyətlərdə şanslarımız çox oldu. Lakin istifadə edə bilmədik. İlk 20 dəqiqədə qol vurmadığımız üçün belə alındı. Bu cür rəqiblərlə oyunlarda mütləq erkən qol vurmalısan. Əks halda çətinliklə üzləşirsən.

- “Sumqayıt” son 6 turda cəmi 1 qələbə qazanıb. Bunu nə ilə əlaqələndirirsiniz?

- Təbii ki, bu, istədiyimiz nəticə deyil. Amma əlimizi yanımıza salmırıq. Sona qədər mübarizə aparacağıq. İnanıram ki, qarşıdakı matçlarda vəziyyəti dəyişəcəyik.

- Sizə elə gəlmir ki, ardıcıl xal itkiləri “Sumqayıt”ı hədəfindən uzaqlaşdırır?

- Təbii ki, şansımız var. Düzdür, hazırda turnir cədvəlində altıncı yerə düşmüşük. Lakin mövsümün sonuna hələ 12 tur qalıb. Bu, 36 xal deməkdir. Qarşıdakı 3 tur bizim üçün çox vacibdir. Həmin matçlarda istədiyimiz nəticələri qazansaq, şansımız artacaq.

- Ola bilər ki, “Sumqayıt” diqqəti daha çox kuboka yönəltsin?

- Hər iki turnirdə şansımız var. “Zirə”ni məğlub etsək və yarımfinala yüksəlsək, əla olar. Bunun üçün çox çalışacağıq. Təbii ki, kubokdan avrokuboklara yol daha qısadır. Bununla belə, hazırda kubok yox, “Kəpəz”lə görüşü düşünürük.

- Həmin matçda uğursuz gedişə son qoymaq mümkün olacaq?

- Bizim üçün çox vacib matçdır. Mütləq qalib gəlməliyik. Lakin bu, asan olmayacaq. Səfərdə oynayacağıq. İstənilən halda bu matçda maksimum nəticə qazanmalıyıq.

Fərəc Aslanov