Montiel: “Nyukasl"la oyunda yaxşı nəticə əldə edə bilərik”

“Qarabağ"ın futbolçusu Coni Montiel Çempionlar Liqasının pley-off mərhələsində "Nyukasl"a qarşı keçirəcəkləri cavab oyunu haqda danışıb.

Futbolxeber.az saytının məlumatına görə, 27 yaşlı yarımmüdafiəçi görüşdən əvvəl təşkil olunan mətbuat konfransında ilk oyundakı səhvlərə toxunub və cavab matçında yaxşı nəticə əldə etməyin mümkün olduğunu deyib:

"İlk oyunun 1-ci hissəsində çox uğursuz, bizə yaraşmayan şəkildə oynadıq. 2-ci hissədə isə daha yaxşı idik. 1-ci hissədə də belə oynamalı idik. Amma bu yarışın səviyyəsi hər kəsə bəllidir. Artıq həmin oyunu unutmalı, cavab matçı barədə düşünməliyik. Əgər ilk oyunun 2-ci hissəsindəki kimi mübarizə aparsaq, düşünürəm ki, yaxşı nəticə əldə edə bilərik".

C.Montiel geridə qalan Liqa mərhələsini dəyərləndirib: "Ümumilikdə Çempionlar Liqasının səviyyəsi məni təəccübləndirmədi. Hər hansı bir oyunun çox asan keçdiyini xatırlamıram. Bu da normaldır, Çempionlar Liqasıdır. Gözləntilərimə qaldıqda isə Azərbaycanın ən böyük klubu olaraq "Qarabağ"dan gözləntilər həmişə yüksəkdir. Biz də bacardığımız qədər bu gözləntilərin qarşılığını verməyə çalışırıq".

İspaniyalı futbolçu "Daha çox 10 nömrə mövqeyində özünüzü sərbəst hiss edirsiniz. Lakin bəzi matçlarda sağ cinahda oynamaq məcburiyyətində qalırsınız. Hansı mövqedə daha çox qol vuracağınızı düşünürsünüz" sualını belə cavablandırıb: "Xoşbəxtlikdən müxtəlif mövqelərə tez adaptasiya oluram. Müxtəlif mövqelərdə çıxış etmək bacarığım var. Amma özümü "10 nömrə" mövqeyində daha yaxşı hiss edirəm. Düşünürəm ki, bu mövqedə öz bacarığımı daha rahat göstərə və komandaya faydalı ola bilərəm. Lakin bilirəm ki, o mövqedə oynaya biləcək başqa futbolçular da var. Ona görə də lazım gələrsə, başqa mövqelərdə də oynamağa həmişə hazıram".

O, vətəni İspaniyada da "Qarabağ"ın uğurlu nəticələri haqda danışıldığını deyib: "Buraya gələndən bəri İspaniya mətbuatına bir neçə müsahibə vermişəm. Həmişə demişəm ki, burada olmaqdan məmnunam və çox xoşbəxtəm. Komanda üçün əlimizdən gələnin ən yaxşısını etməyə çalışırıq. Burada bizə belə dəyərlər aşılanır. Tələblər də yüksəkdir. Mən də demişəm ki, tələblər yüksək olduğu kimi biz də uğurlu olmaq üçün əlimizdən gələni edirik".