Siyasət Əsgərov: “Çox önəmli oyuna çıxacağıq”

Azərbaycanın qadınlardan ibarət millisinin baş məşqçisi Siyasət Əsgərov UEFA Millətlər Liqasının qrup mərhələsi çərçivəsində bu gün Litvaya qarşı keçirəcəkləri oyunla bağlı fikirlərini bölüşüb.

Futbolxeber.az-ın AFFA-nın saytına istinadən verdiyi məlumata görə, mütəxəssis komandadakı ab-havanın yüksək olduğunu və rəqibi yaxşı analiz etdiklərini vurğulayıb:

“Litvaya qarşı çox önəmli oyuna çıxacağıq. Ardıcıl iki səfər matçı keçirəcəyik. Dörd gün sonra Monteneqro kollektivinin qonağı olacaq. Ancaq indi bütün diqqətimizi Litva ilə qarşılaşmaya yönəltmişik. Litva ilk matçda Monteneqroya məğlub olub. Üç komandalı qrupda yer aldığımızdan, bugünkü oyunun önəmi çox böyükdür. Bəzi itkilərimiz olsa da, komandaya cəlb olunan futbolçuların bu boşluğu dolduracaqlarına inanıram. Düşərgədə ab-hava yüksəkdir, heyətdə yer alan oyunçuların heç birinin zədəsi yoxdur. Rəqibi təhlil etmişik, zəif və üstün cəhətlərini bilirik. Məşq proseslərini də buna uyğun qurmuşduq. Rəqibi səhv buraxmağa məcbur edə bilsək, istədiyimiz nəticəni qazanacağıq”.

Qeyd edək ki, Vilnüsdəki “Jalgiris” stadionunda keçiriləcək Litva - Azərbaycan oyunu Bakı vaxtı ilə saat 19:30-da başlayacaq.

Xatırladaq ki, Millətlər Liqasının C liqasında yarışan Azərbaycan millisi ilk oyunda Montoneqro komandası ilə heç-heçə edib.

Millimizin yer aldığı 3 komandalı 4-cü qrupda Montenqro 4 xalla (2 oyun) lider, Azərbaycan (1 oyun) 1 xalla 2-cidir. Litvanın (1 oyun) isə xalı yoxdur və 3-cü pillədə qərarlaşıb.