“Neftçi”nin hücumçusundan unikal göstərici - heksa-trikə imza atdı

AFFA-nın bayrağı altında təşkil edilən U-17 Liqasında XIX turun oyunları keçirilib.

Futbolxeber.az saytının məlumatına görə, öz meydanında “Şamaxı”nı qəbul edən “Neftçi” rəqibini 14:0 hesabı ilə üstələyib.

“Ağ-qaralar”ın heyətində Murad Abbaslı, Nicat Əzizli, Ramal Abışov, Vüsal Kərimov, Elvin Vəliyev və Fateh Əskərzadə hərəyə 1 dəfə fərqləniblər, Pünhan Qasımzadə isə dubl edib. Elnur Abdullayev isə futbolda nadir hallarda rast gəlinən nəticəyə imza atıb. O, 6 qol vurmaqla heksa-trik müəllifi olub.

Qeyd edək ki, U-17 Liqasında 18 oyundan 46 xal toplayan “Zirə” liderdir. 1 oyun az keçirən “Neftçi” 43 xalla ikinci, 17 matçdan sonra 41 xal toplayan “Qarabağ” isə üçüncüdür.