“Yuventus” sabiq müdafiəçisini geri qaytarmaq istəyir

“Sassuolo”nun müdafiəçisi Tarik Muharemoviç sabiq klubu “Yuventus”a qayıda bilər.

Futbolxeber.az saytının məlumatına görə, bu barədə tanınmış insayder Nikola Skira yazıb.

Turin klubu ötən il 2 milyon avroya satdığı 23 yaşlı futbolçunu geri qaytarmaq istəyir. Bildirilir ki, bosniyalı müdafiəçi 1 il əvvəl klubu tərk etsə də, onun transfer hüququnun 50 faizi hələ də “Yuventus”a məxsusdur.

Lakin “Qoca Sinyora” Muharemoviçin yeganə müştərisi deyil. İngiltərə klubları da onun xidmətində maraqlıdır. “Bornmut” bosniyalı futbolçu üçün 35 milyon avro ödəməyə hazırdır. Eləcə də “Tottenhem” Tarik Muharemoviçi heyətinə qatmağı hədəfləyir.

Qeyd edək ki, son mövsüm bosniyalı müdafiəçi A seriyasında 32 matçda meydana çıxıb, 2 qol vurub, 2 dəfə də məhsuldar ötürmə müəllifi olub.