Hollan Premyer Liqa tarixində 10-cu oldu

“Mançester Siti”nin hücumçusu Erlin Hollan İngiltərə Premyer Liqasının 30-cu turunda “Sautgempton”la oyunda (4:1) dubl edib.

Futbolxeber.az saytının məlumatına görə, 22 yaşlı forvard cari mövsüm Premyer Liqada vurduğu qolların sayını 30-a çatdırıb.

Hollan liqa tarixində bir mövsüm ərzində minimum 30 qol vurmağı bacaran sayca 10-cu futbolçudu. Norveçli hücumçu 27 oyunda buna nail olub.

Siyahıda həmçinin Endi Koul (34 qol, 1993/94), Alan Şirer (31 qol 1993/94 mövsümündə, 34 qol 1994/95 mövsümündə və 31 qol 1995/96 mövsümündə), Kevin Fillips (30 qol, 1999/00), Tyerri Anri (30 qol, 2003/04), Kriştianu Ronaldo (31 qol, 2007/08), Robin van Persi (30 qol, 2011/12), Luis Suares (31 qol, 2013/14), Mohamed Salah (32 qol, 2017/18) və Harri Keyn (30 qol, 2017/18) yer alıb.