“Kim acdırsa, o, yatmaq istəmir” ifadəsi məhz “Napoli” barədədi”

“Napoli”nin baş məşqçisi Luçano Spaletti A seriyasının 27-ci turunda “Torino” üzərində qazanılan 4:0 hesablı qələbəni şərh edib.

Futbolxeber.az saytının “Football-Italia”ya istinadən verdiyi məlumata görə, o, komandasının əla təsir bağışladığını bildirib:

“Biz qələbəyə acıq. Oyundan əvvəl futbolçularla söhbət edərkən bir daha əmin oldum ki, onlar nəyin bahasına olursa-olsun, uğur qazanmaq istəyirlər. Neapolda belə bir deyim var: “Kim acdırsa, o, yatmaq istəmir”. Bu ifadə məhz bizim üçün deyilib. Məsələ heç də Osihmenin 2 qolunda, yaxud üçüncü qolda hamının danışdığı kimi, Kvaratsxeliyanın zərbəsində deyil. Siz diqqətli fikir verin. Həmin qolda hər şey Di Lorenstodan başladı. O, əsl çempiondu”.

Qeyd edək ki, bu qələbə sayəsində xallarının sayını 71-ə çatdıran “Napoli” hazırda ən yaxın izləyicisini 21 xal qabaqlayır.