Semak “Fənərbaxça” ilə oyundan danışdı

“Zenit”in baş məşqçisi Sergey Semak “Fənərbaxça”ya qarşı keçirəcəkləri xeyriyyə oyunundan danışıb.

Futbolxeber.az saytının məlumatına görə, rusiyalı mütəxəssis komandasını güclü rəqibə qarşı maraqlı matçın gözlədiyini bildirib:

“Bu, bizim üçün güclü rəqibə qarşı oynamaq üçün yaxşı şansdı. Bəli, rəqibin heyətində zədəli, eləcə də milli komandaların düşərgəsinə yollanan futbolçular var. Lakin “Fənərbaxça” Türkiyə çempionatında yalnız “Qalatasaray”dan geri qalır.  Avroliqada da “Sevilya”ya qarşı çox yaxşı çıxış etdilər, qrup mərhələsini də lider kimi başa vurmuşdular. Odur ki, bizi çox güclü rəqibə qarşı maraqlı oyun gözləyir.

Üstəlik, zəlzələdən zərər çəkmiş insanlara az da olsa faydamız dəyəcək. Bu isə çox önəmlidi”.  

Xatırladaq ki, martın 23-də İstanbulda keçiriləcək “Fənərbaxça” - “Zenit” oyunundan əldə olunacaq gəlir Türkiyədə zəlzələdən əziyyət çəkmiş insanlara sərf olunacaq.