Qriqorçuk istəmədi, sabiq “Bakı”lıya üz tutdular

“Qəbələ” klubunun baş məşqçisi Roman Qriqorçuk Latviya millisini çalışdıra bilərmi. Futbolxeber.az-ın məlumatına görə, bu barədə sözügedən ölkənin futbol federasiyasının baş katibi Yanis Mezeckis açıqlama verib.

 

O ukraynalı mütəxəssisin siyahıda ilk yerlərdə olduğunu deyib “Düzdür, latviyalı məşqçinin olması hamımızın ilk istəyi idi. Biz Azərbaycan klubu “Qəbələ”ni iki dəfə Avropa Liqasının qrup mərhələsinə daşımış Roman Qriqorçukla da danışdıq. Lakin danışıqlar yarımçıq qaldı. Onun “Dauqavpils”də və “Ventsplis”də gördüyü işlərə hörmətimiz var. Amma Qriqorçuk özünü klubda daha yaxşı hiss etdiyini bildirdi”.

 

Qeyd edək ki, bir neçə gün öncə Latviya millisinin baş məşqçi postuna yerli mütəxəssis Aleksandr Starkov gətirilib. O, vaxtilə “Bakı” klubunda da baş məşqçi işləyib.