Azərbaycan millisinin erməniyə görə kənarda qaldığı turnirin qalibi Ukrayna oldu

Belarusda 17 yaşadək futbolçulardan ibarət milli komandalar arasında keçirilən “İnkişaf kuboku-2016”ya yekun vurulub. Futbolxeber.az-ın məlumatına görə, 12-ci dəfə keçirilən budəfəki yarışda 12 komanda iştirak edib: Belarus, Latviya, Slovakiya, İran, Rusiya, Litva, İsrail, Ermənistan, Ukrayna, Moldova, Gürcüstan və Finlandiya.

Turnirin qalibi Ukrayna yığması olub. Ukraynalılar finalda Belarusa 3:1 hesabı ilə qalib gəlib. Yarışın qalibi olan Ukrayna millisi Bakıda U-17 yığmamızla üz-üzə gələcək. Bakı Olimpiya Stadionunun ehtiyat meydançasında keçiriləcək Azərbaycan - Ukrayna oyunları martın 1-i və 3-də baş tutacaq.

Qeyd edək ki, Belarusda keçirilən bu yarışa Azərbaycan millisi dəvət almır. Buna səbəb Belarus Futbol Federasiyasının rəhbərlərindən biri - Sergey Safaryan Vaqarşakoviçin erməni olmasıdır. Məhz Safaryanın sayəsində yığmamız sözügedən turnirə dəvət almır.