“İnter” Bakıya yeni baş məşqçinin rəhbərliyi altında gələ bilər

Avroliqanın qrup mərhələsində “Qarabağ”ın rəqibi olan “İnter”in baş məşqçi postunda tezliklə dəyişiklik baş verə bilər. Futbolxeber.az-ın “Corriere dello Sport”a istinadən verdiyi məlumata görə, “A” seriyasının yeddinci turunda “İnter” “Napoli”yə uduzsa, o zaman hazırki baş məşqçi Valter Madzarri postundan qovulacaq. Onun yerinə əsas namizəd isə Valter Zenqa hesab olunur. Zenqa hazırda BƏƏ-nin “Əl-Cəzirə” klubunu çalışdırsa da, təklif olacağı halda İtaliyaya qayıtmağa hazır olduğunu bəyan edib. Mazzarini əvəzləyə biləcək digər məşqçi isə “Sampdoriya”nı çalışdıran Sinişa Mihayloviçdir.

Xatırladaq ki, “A” seriyasının son 2 turunda xala həsrət qalan və hər iki halda da böyükhesabla uduzan “İnter”, Avroliqanın ikinci turunda “Qarabağ”ı öz meydanında 2 cavabsız qolla üstələyib. Komandalar arasında Bakıdakı oyun isə dekabrın 11-də keçiriləcək.