Avropa çempionatı: Güləşçilərimizdən 3 qızıl, 1 bürünc medal

Slovakiyanın paytaxtı Bratislavada güləş üzrə Avropa çempionatına bu gün yekun vurulur.

Futbolxeber.az saytının məlumatına görə, Azərbaycanın üç yunan-Roma güləşçisi qızıl medal uğrunda yarışıb.

Nihat Məmmədli (60 kq), Həsrət Cəfərov (67 kq) və Qurban Qurbanov (82 kq) final görüşünə çıxıblar. Hər üç idmançımız qalib gələrək Avropa çempionu olublar.

Ülvi Qənizadə isə (72 kq) bürünc medal uğrunda mübarizə aparıb. O, təsəlliverici görüşdə rusiyalı Alen Mirzoyana 3:1 hesabıyla qalib gələrək bürünc medal uğrunda qarşılaşmaya vəsiqə qazanıb. Daha sonra belaruslu Aleksandr Liavonçikə (UWW) qalib gələn idmançımız ölkəmizə daha bir medal qazandırıb.

Qeyd edək ki, daha əvvəl sərbəst güləşçilər 1 qızıl, 1 gümüş və 4 bürünc mükafata sahib çıxıblar. Giorgi Meşvildişvili (125 kq) Avropa çempionu olub, Osman Nurməhəmmədov (92 kq) gümüş, İslam Bazarqanov (57 kq), Əli Rəhimzadə (65 kq), Kənan Heybətov (70 kq) və Ağanəzər Novruzov (74 kq) bürünc medala sahib çıxıblar.