Azərbaycan boksçuları “Drakula” beynəlxalq turnirində iştirak edəcəklər

Bu gün Rumıniyanın Ploişti şəhərində start götürəcək yeniyetmə və gənc boksçular arasında “Drakula” beynəlxalq turnirində Azərbaycan boksçuları da çıxış edəcəklər.

 

Futbolxeber.az saytına bu barədə Azərbaycan Boks Federasiyasının mətbuat xidmətindən məlumat verilib.

 

Yeniyetmələrdən ibarət yığmanın baş məşqçisi Vaqif Kazımov və məşqçi Teymur Məmmədov yarışda Əli Məmmədov (46 kq), Zakir Həsənzadə (48 kq), İsmayıl Rzayev (50 kq), Bağır Əmirxanlı, Raul Heydərli (hər ikisi 52 kq), Sübhan Babayev (54 kq), Haqverdi Həsənov, Tamerlan Əlimzanov (hər ikisi 57 kq), Nurlan Abışov (60 kq), Kənan Aslanlı (63 kq), Valeh Eyvazlı (66 kq), Rza Rzayev (70 kq), İsmayıl Vəliyev (75 kq), Əmir Abbasov (80 kq) və Səftər Məmmədzadəni (+80 kq) sınayacaq.

 

Gənclərdən ibarət millinin baş məşqçisi Elbrus Rzayev və məşqçi Elvin Məmişzadənin rəhbərliyi altında isə Bilalhəbəşi Nəzərov (48 kq), Zidan Hümbətov (51 kq), Ömər Aslanlı, Tağı Nəsibov (hər ikisi 54 kq), Elbrus Kərimli (57 kq), Məhəmmədəli Qasımzadə (60 kq), Abbasqulu Şadlinski (67 kq) və Ziya Həsənov (71 kq) mübarizə aparacaqlar.

 

“Drakula”da Azərbaycanı hakim kimi Qalib Əbiyev təmsil edəcək.

 

Qeyd edək ki, yarışda final döyüşləri fevralın 17-18-də baş tutacaq. Komandamız Vətənə ayın 19-da qayıdacaq.