Deputatdan etiraz: “Belə də idman olar?”

Milli Məclisin deputatı Ağacan Abiyev Azərbaycan telekanallarında qaydasız döyüş idman növü üzrə kadrların yayımının dayandırılması təklifi ilə çıxış edib. Futbolxeber.az saytının modern.az-a istinadən verdiyi məlumata görə. o, bu təklifi parlamentin Ailə, qadın və uşaq məsələləri komitəsinin bu gün keçirilən iclasında səsləndirib.

Deputat deyib ki, qaydasız döyüşlər insanlarda, televiziya tamaşaçılarında, xüsusilə uşaq və yeniyetmələrdə qəddarlıq hisslərinin aşılanmasına səbəb olur: “Mən özüm idmançıyam və daha çox da idman verilişlərini izləyirəm. Televiziyalarımızda qaydasız döyüşlər yayımlanır ki, mən bunun tam əleyhinəyəm. Çünki bu, qəddarlıqdır, vəhşilikdir.

Kimsə yerə yıxılır, uzanır, başqası da onun üzünə-gözünə döyəcləyir, onu qana boyayır. Belə də idman olar? Sovetlər dövründə eşidərdik ki, Amerikada belə bir yarış var və hamı onu pisləyərdi. İndi nə oldu, pislədiyimiz şeyləri özümüz təbliğ edirik?

İdmanda rəqibə qarşı kişilik, hörmət olur. Burada isə kişilik, hörmət yoxdur. Ona görə də hesab edirəm ki, bu cür yarışların yayımı dayandırılmalıdır”.