Elşad Quliyev: "Turnir bizim üçün bundan sonra başlayır"

Minifutbol üzrə Azərbaycan millisi Avropa çempionatında qrup mərhələsinin üçüncü turunda Fransanı 3:2 hesabı ilə məğlub edib.

Futbolxeber.az saytının məlumatına görə, yığmamızın baş məşqçisi Elşad Quliyev matçdan sonra keçirilən mətbuat konfransında qələbəni şərh edib.

O, futbolçularının qələbəyə baxmayaraq, müəyyən səhvlərinin olduğunu deyib:

“Turnir bizim üçün bundan sonra başlayır. Səhvlərimizi bugünkü oyunda gördük. Öz üzərimizdə işləyəcəyik ki, bunları təkrarlamayaq. Oyunçularımı təbrik edirəm. Pley-offdakı rəqibimizi təhlil edəcəyik və daha yaxşı hazırlaşmağa çalışacağıq. Qazaxıstan yığması ilə oyunumuz çətin olacaq. Qələbə qazanaraq yolumuza davam etmək niyyətindəyik".

Xatırladaq ki, Azərbaycan komandası qrup mərhələsində Avstriya (1:0), İtaliya (3:0) və Fransanı (3:2) məğlub edib. E.Quliyevin baş məşqçisi olduğu kollektiv 1/8 finalda Qazaxıstan millisi ilə üz-üzə gələcək.