Mirmehdi Rzayev: "İtaliyaya mütləq qalib gəlməliyik”

“Dünən İtaliya millisinin Fransa ilə oyununa baxdıq. Görüş heç-heçə bitdi. Bu bizə də sərf edir. İtaliya ilə bugünkü matçda mütləq qələbə qazanmalıyıq”.

Futbolxeber.az saytının məlumatına görə, bu sözləri minifutbol millimizin üzvü Mirmehdi Rzayev bu gün Avropa çempionatının qrup mərhələsinin ikinci turunda İtaliyaya qarşı keçirəcəkləri oyun barədə danışarkən deyib.

O, Avstriyanı ilk turda 1:0 hesabı ilə məğlub etdikləri görüşdən də söz açıb:

“Oyunun ağır keçəcəyini bilirdik. Bu, ilk matçımız idi. Meydança amili də sözünü dedi. Amma yenə də qələbə qazana bildik. Bugünkü matçda da qələbəni hədəfləyirik. Qrupu lider kimi başa vurmaq niyyətindəyik. Avstriyanın bizə bu qədər müqavimət göstərəcəyini gözləmirdik. Belə güclü olduqlarını bilmirdik. Heyətlərində böyük futbolda iştirak etmiş simalar var idi".

Xatırladaq ki, bu gün "Tipos Arena"da keçiriləcək İtaliya - Azərbaycan oyunu Bakı vaxtı ilə saat 17:45-də start götürəcək.