Minifutbol Federasiyasının vitse-prezidenti: “Titulu qorumaq istəyirik”

“Milli komandamız hazırda təlim-məşq toplanışındadır. Bu yaxınlarda kollektiv Monteneqroda təlim-məşq toplanışında oldu və mini turnirdə çempion adını qazandı”.

Futbolxeber.az saytının məlumatına görə, bu sözləri Azərbaycan Minifutbol Federasiyasının vitse-prezidenti Taleh Nəsibov deyib.

Avropa çempionatı öncəsi milli komandamızın bugünkü açıq məşqi zamanı jurnalistlərin suallarını cavablandıran federasiya rəsmisi qarşıya qoyulan məqsədlərdən də danışıb: “2022-ci ildə qazandığımız titulu qorumaq istəyirik. Bu, əlbəttə ki, çətin olacaq. Amma əlimizdən gələni edirik, milli komandamız üçün hər cür şərait yaratmışıq. Digər komandalar bizi lider kimi qəbul edirlər. Rəqiblər artıq Azərbaycan millisinə başqa gözlə baxırlar, bizimlə oyunlara daha yaxşı hazırlaşırlar. Minifutbol üzrə Azərbaycan çempionatının oyunları istər televiziya, yutub vasitəsi ilə canlı yayımlanır. Bu da rəqiblərə millimizi təhlil etmək, oyunları yaxından tanımaq üçün fürsət yaradır. Qrupda rəqiblərimiz Belçika, İtaliya və Fransadır. Əminəm ki, biz yüksək xalla qrupdan lider çıxacağıq. Ümid edirik ki, çempion olaraq geri dönəcəyik”.

T.Nəsibov bildirib ki, Azərbaycan Minifutbol Federasiyasının ayrıca stadionu olması üçün maliyyəyə ehtiyac var: “Bu, vəsait tələb edir. Artıq plan və layihə var. Maddi çətinliklər var ki, onların üzərində iş gedir. Yaxın gələcəkdə mətbuata bu barədə açıqlama veriləcək.

O, “Avropa çempionluğu həmin arenanın inşasını tezləşdirə bilər?” sualını belə cavablandırıb: “Yəqin ki, böyük təsiri olacaq. Bunun üzərində işlər görülməsi üçün zəmin yaradacaq”.

T.Nəsibov qeyd edib ki, komandada hər kəs çempionluğa köklənib: “Hər idmançı yarışa çıxanda qızıl medalı fikirləşməlidir. Məncə, 1-ci yer ən böyük uğurdur. Digər yerlər isə ürəkaçan deyil. Biz daha yaxşısına layiqik. Futbolçularımız da məsuliyyəti dərk edirlər. Hər kəsin beynində çempionluqdur”.

Tale Nəsibov ölkədə minifutbola artan marağın qarşılığında coğrafi arealı genişləndirməyi planlaşdırdıqlarını söyləyib: “Regionlarda komandaların sayının artmasının üzərində çalışırıq. Həmçinin, müəyyən yaş qruplarında da çempionatların təşkil olunmasını istəyirik. Çünki gələn ildən U-23 dünya və Avropa çempionatları keçiriləcək. Biz də ora milli komanda hazırlamağa start verəcəyik”.