“Əsas məsələ mənim məhsuldar ötürmə verməyim deyil, "Neftçi"nin qələbə qazanmasıdır”

"Bu komandada olduğum üçün böyük qürur hissi duyuram". Futbolxeber.az saytının məlumatına görə, bu sözləri "Neftçi"nin futbolçusu Viçko Şevel deyib.

26 yaşlı yarımmüdafiəçi Azərbaycan Premyer Liqasının VI turunda səfərdə "Qəbələ"yə 3:0 hesabı ilə qalib gəldikləri oyundan sonra fikirlərini bölüşüb. O, "Neftçi"nin çempionatdakı 1000-ci oyununa start heyətində başlamağın şərəf olduğunu deyib: “Belə möhtərəm gündə səfərdə qələbə qazandığımız üçün çox sevinirəm”.

Xorvat futbolçu “Qəbələ” ilə görüşdə etdiyi məhsuldar ötürmədən də danışıb: "Müxtəlif mövqelərdə oynaya bilərəm. Bu gün sırf dayaq yarımmüdafiəçisi kimi çıxış etdim. Əsas məsələ mənim məhsuldar ötürmə verməyim deyil, "Neftçi"nin qələbə qazanmasıdır”.

Şevel növbəti matçlarda "Sabah", "Qarabağ" və "Turan Tovuz"la qarşılaşmalarla bağlı gözləntilərini də bölüşüb: "Bizi ağır qrafik gözləyir. Buna baxmayaraq, biz "Neftçi"yik və bunu göstərməliyik. Öz üzərimizdə işləyərək bu matçlara hazırlaşacağıq. Oyundan-oyuna qələbələr qazanmağa çalışacağıq. Qarşıda üç həftəlik fasiləmiz olacaq. Bundan da düzgün yararlanmağa çalışacağıq".