Zaur İsmayılov: “Müdafiədə kobud səhvlərimiz olur”

"Rəqibi qələbə münasibəti ilə təbrik edirəm. Birinci hissədə müdafiədə iki kobud səhvə yol verdik. Ondan sonra da qapımızda penaltilər gördük”.

Futbolxeber.az saytının məlumatına görə, bu sözləri "Araz-Naxçıvan"ın baş məşqçisi Zaur İsmayılov Azərbaycan Premyer Liqasının 6-cı turunun "Şamaxı" ilə (1:2) görüşündən sonra keçirilmiş mətbuat konfrasında deyib.

O, jurnalistlərin suallarını da cavablandırıb.

- Qapınıza təyin edilən penaltilərlə razılaşırsınız?

- Birinci penalti bir az mübahisəlidi. Baş hakim qərar verdi, sonra VAR-dan çağırdılar, epizoda çox baxdı. Yəqin ki, qapıçımızın topu çıxardıqdan sonra ikinci epizoddakı toxuşununun olub-olmadığına baxırdılar. Birinci epizod mübahisəli idi, ancaq ikinci epizodda penalti var idi.

- Ağadadaş Salyanskinin ardıcıl üçüncü qolu haqda nə deyərdiniz?

- Ehtiyatda oturanda da məşqlərdə daim çalışırdı. Sonradan da start heyətinə düşdü və ardıcıl qollar vurdu. Bu gün ikinci qolunu da vura bilərdi. Amma top dirəkdən qayıtdı. Yaxşı hal odur ki, ardıcıl qollar vurur.

- Milli fasiləyə qədər olan dövrü yəqin ki, uğursuz saymaq olar?

- Bəli.

- Fasilə zamanı nəyi dəyişəcəksiniz?

- Müdafiədə kobud səhvlərimiz olur. Bunlar üzərində maksimum işləmək lazımdır. Hücumda da düşən epizodları vurmaq gərəkdir. Çatışmazlıqların üzərində işləyəcəyik.