Əfran İsmayılovun israfçılığı...

İsrafçılıq zərərli vərdişdir. Quranda da buyurulur ki, Allah israf edənləri sevməz. Hətta dəstəmaz alanda suyu həddən artıq istifadə etmək dində məkruh sayılır...

Təəssüf ki, bu gün milyonların dövr etdiyi Azərbaycan futbolunda əksəriyyət israfçılığın zərərli vərdiş olduğunu “unudub”. Eynən “Şəfa”nın vitse-prezidenti Əfran İsmayılov kimi...

Dövlətin və sponsorun milyonlarını lazımsız legionerlərə xərcləyən klub rəhbəri transferlərdə israf etdiyi kimi, özünə də korluq vermir. Deyilənə görə, “Şəfa”nın Qəbələyə səfəri zamanı komandanın məskunlaşdığı “Karvansaray” otelində ən bahalı otaqda – “Superior king”də məhz Əfran İsmayılov məskunlaşıb. Təbii ki, klubun vitse-prezidentidir, istər ən bahalı otaqda qalar, istər ən ucuz. Sadəcə insanın gərək əməli ilə sözü də üst-üstə düşsün axı. Hər yerdə “Mən “MyGroup”un pullarını dağıda bilmərəm” (“Şəfa”nın sponsoru “MyGroup Holding” nəzərdə tutulur - red.) demək hara, 1 günlük Qəbələ səfərində ən bahalı otaqda qalmaq hara?..

Əslində “Şəfa”nın israfçılığa meyilli olduğu əvvəldən bəlli idi. Komanda II Liqadan I Liqaya yüksələndə də, I Liqada çempion olub Premyer Liqaya vəsiqə qazananda da bu uğurun altında yerli futbolçuların imzası var idi. Gəl ki, komanda Premyer Liqaya yüksələn kimi, bir çox futbolçu komandaya “lazım olmadı”. Əfran bəy çempionat başlamamış yerlilərin “qiymət oxumasını” bəhanə edərək “Şəfa”nın legionerlərə “qucaq açması”na haqq qazandırdı. Nəticədə də paytaxt təmsilçisi 10 legioner transfer etdi. Təbii ki, soruşsan, deyəcəklər ki, “Şəfa”nın “İmişli”dən, “Şamaxı”dan nəyi əskikdir, onlar gətirə bilir, biz yox? Haqlıdırlar da.

Burda birinci günah AFFA-dadır. Limitin ləğvi yeni nəsil klub idarəçilərinin əl-qolunu açıb və dövlətin ayırdığı milyonları sağa-sola xərcləyirlər. Belə baxanda bu, “Şəfa”nın da haqqıdır. Amma daha Belçikanın dördüncü liqasından yox da... Təəssüf ki, indiki məqamda əlimizdən heyif dövlətin ayırdığı milyonlara deməkdən başqa heç nə gəlmir...

FUTBOLXEBER.AZ