Taleh Nəsibov: “Millimiz Avropa çempionatına çox yaxşı hazırlaşmışdı”

“Oyunlarımız çox çətin keçdi. Qrupda birinci olduq. Bundan sonra pley-offda bizi çox güclü rəqiblər gözləyirdi”.

Futbolxeber.az saytının məlumatına görə, bu sözləri Azərbaycan Minifutbol Federasiyasının (AMF) icraçı vitse-prezidenti Taleh Nəsibov milli komandamızın tarixində ikinci dəfə Avropa çempionu olmasını şərh edərkən deyib.

O, qazanılan uğuru komandanın hazırlığını yüksək səviyyədə olması ilə əlaqələndirib: “Rəqiblər güclü olsa da, komandamız turnirə çox yaxşı hazırlaşmışdı. Fiziki durum yaxşı idi. Bunun sayəsində ardıcıl qələbələrlə finala adladıq. Həlledici görüşdə də qalib gəlməklə ikinci dəfə Avropa çempionu olduq. Biz həm də son dünya çempionuyuq. Bu onu göstərir ki, uşaqların hazırlığı tam yerində idi”.

Federasiya rəsmisi çempionluqda azarkeşlərin də rol oynadığını söyləyib: “Slovakiyadakı səfirliyimizin əməkdaşlarına minnətdarlığımızı bildiririk. İlk gündən bizim yanımızda oldular. Komandanı turnir boyu dəstəklədilər. Hər oyunumuzda zala istər Bratislavada, istərsə də Avropanın digər şəhərlərində yaşayan həmyerlilərimiz toplaşırdılar. Eləcə də Azərbaycanda komandamıza çox güclü dəstək var idi. Bu dəstəyin qarşılığında komandamız hər oyuna qələbə üçün çıxırdı. Yekunda da çempion olduq”.

T.Nəsibov ölkə rəhbərliyinin milli komandamıza dəstəyini xüsusi vurğulayıb: “Cənab Prezidentimizə təşəkkürümüzü bildiririk. Vətənə qayıdan kimi dövlət başçımız tərəfindən Azərbaycan Minifutbol Federasiyasına 1 milyon manat ayrılması haqda sərəncamı eşitdik. Həm federasiyamız, həm də komandamız adından cənab Prezidentimizə minnətdarıq. Daim dövlət başçımız bizə diqqət göstərir. Bu, bizi çox qürurlandırır. Məhz bu diqqət və qayğının nəticəsi daim komandamızın qazandığı uğurlu nəticələrdə böyük rol oynayır”.