Tovuzda baş verənlərə reaksiyam: “Nu i?”

Tovuzda baş verənlər çox şişirdilir. Şükür Allaha, ölüm olmayıb, itim olmayıb. Heç o boyda projektor aşanda belə reaksiya verilməmişdi.

Futboldur da - biri qışqırar, biri mübahisə edər, biri hakimə etirazını bildirər, lap biri də rəqibi təxribata çəkər. Bütün bunlarda qeyri-adi nə var ki? Hər biri futbolun ayrılmaz hissəsidir.

Futbol balet deyil ki!.. Mübahisə də olar, dava da, “qırğın” da. Futbol həm də bu tərəfləri ilə gözəldir.

Nədənsə, dünəndən bəri Ehtiram Quliyev, ətrafı, “Turan Tovuz” rəsmiləri tənqid hədəfinə çevriliblər. Halbuki şişirdiləcək hadisə baş verməyib.

“Turan Tovuz” inamlı futbol sərgilədi, rəqibdən üstün idi və əzmkarlıqla qələbə qazandı. Açığı, “Zirə” heç “Sabah”a 0:5 uduzduğu oyunda bu qədər sıx, praqmatik futbol oynamamışdı. Yəni Tovuz klubu dünən rəqibi ilə müqayisədə qələbəyə daha layiq idi. Sonda da əzmkarlıq sayəsində 3 xal qazandı.  Komandanın sərgilədiyi futbol qalıb bir tərəfdə, meydandan kənar hadisələr müzakirə obyektinə çevrilib. Özü də meydandan kənarda da ciddi nəsə baş verməyib axı. Hər oyunda ola biləcək xırda məsələlərdir.

Son zamanlar “Ehtiram Quliyev yaxşıdır, ətrafı pis” fikri formalaşdırılmağa çalışılır. Mən kimisə qınamaq fikrindən uzağam. Hər kəs fikrini ifadə etməkdə azaddır. Amma gəlin görək Azərbaycan futbolunda bu gün rəhbər vəzifədə olanların guya neçə faizi uşaqlıqdan topla yatıb-durub?! Klublar bir qırağa, AFFA İcraiyyə Komitəsində təmsil olunanların neçəsi Azərbaycan futbolu haqqında dolğun məlumata sahibdir?! Mövsüm ərzində ölkə çempionatının neçə oyununa baxırlar?! Ümumiyyətlə, baxırlarmı?! Orada hələ də futbola fitbol deyən adamlar var e... Onlar işləyə bilər, Ehtiram Quliyevin ətrafı yox?!.

İBRAHİM