Azərbaycan minifutbol çempionatı: 1/4 final cütləri müəyyənləşib

Minifutbol üzrə Azərbaycan çempionatında 1/4 final mərhələsinin cütləri müəyyənləşib.

Futboxleber.az saytının məlumatına görə, reqlamentə əsasən, ilk mərhələnin qalibi olan “Zirə” 8-ci yeri tutan “Aznur”la qarşılaşacaq. 15 turdan sonra ikinci olan “Birbaşa Bakı” 7-ci pillədə qərarlaşan “İnter”lə üz-üzə gələcək. İlk mərhələni üçüncü pillədə başa vuran “Odlar Yurdu” altıncı pillədə qərarlaşan “Abşeron”la münasibətlərə aydınlıq gətirəcək. Son 1/4 final cütündə isə 15 turdan sonra müvafiq olaraq 4 və 5-ci yerin sahibləri - “Real Bakı” - “Qalaksi” görüşəcək.

Bu mərhələnin ilk qarşılaşmaları aprelin 3-də, cavab matçları isə 1 həftə sonra oynanılacaq.

Yarımfinal cütləri isə belə formalaşacaq:

“Zirə” - “Aznur” cütünün qalibi /“Real Bakı” - “Qalaksi” cütünün qalibi

“Birbaşa Bakı” - “İnter” cütünün qalibi / “Odlar Yurdu” - “Abşeron” cütünün qalibi