Breno Almeyda: “Çempion biz olacağıq”

“Neftçi”nin yarımmüdafiəçisi Breno Almeydanın Futbolxeber.az saytına müsahibəsi

- Azərbaycan Premyer Liqasının 10-cu turunda səfərdə “Şamaxı”nı məğlub etdiniz. 3:2 hesablı qələbəni necə şərh edərdiniz?

- Düşünürəm ki, bizim üçün vacib qələbə idi. Bilirdik ki, oyun çətin keçəcək. Bir daha sübut etdik ki, biz vahid komandayıq, birlikdəyik və çempionluğa köklənmişik. Bütün rəqiblərə hörmətlə yanaşırıq. Lakin hər oyuna qələbə üçün çıxırıq.

- Matçdan öncə məlum idi ki, qələbə qazansanız, liderliyə yüksələcəksiniz. Bu məqam motivasiyanızı artırırdı, yoxsa üzərinizdə əlavə təzyiq yaradırdı?

- Xeyr, hər hansı təzyiqdən söhbət gedə bilməz. Əksinə, bu məqam bizi daha da motivasiya edirdi.

- Rəqib ikinci dəfə hesabı bərabərləşdirdikdən sonra qələbəyə inamınız qalmışdı?

- Əlbəttə, sona qədər qalib gələcəyimizə inanırdıq. Əlimizdən gələni etdik və üçüncü qol vurduq.

- Bəs 3:2-dən sonra “Qarabağ”la matçdakı nəticənin təkrarlanacağından ehtiyatlanırdınız?

- “Qarabağ”la oyuna qayıtsaq, həmin matçda biz bir xala yox, daha artığına layiq idik. Məncə, o görüşdə heç nədən iki xal itirdik. Amma futbolda bəzən belə hallar da olur.

- Təqvim “Neftçi” üçün münasibdir. Komandanın qış çempionluğu şansını necə dəyərləndirirsiniz?

- Hazırda düşüncəmiz yalnız növbəti oyundadır. Qarşıda bizi “Kəpəz”lə ev matçı gözləyir. Hədəfimiz həmin görüşdə də qələbə qazanmaq və azarkeşlərimizi sevindirməkdir.

- Hesabınızda 9 qol var və çempionatın bombardirisiniz. Mövsümün sonuna qədər zirvədə qala biləcəksiniz? Son 13 mövsümdə çempionatın bombardiri cəmi 1 dəfə 20 qol həddini keçib...

- Açığı, rəqəmlərə o qədər önəm vermirəm. Vacib olan komandanın qələbəsidir. 9 qol vurmuşumsa, bu, həm də komanda yoldaşlarımın zəhməti, əməyidir.

- Sizcə, çempionluq uğrunda mübarizə sona kimi 3 komanda arasında gedəcək?

- Biz çempion olacağıq.

- Mətbuatda Kipr klublarından təklif aldığınız, qışda “Neftçi”dən ayrıla biləcəyiniz haqda xəbərlər yayılıb. Bu, nə dərəcədə doğrudur?

- Mən mətbuatı oxumuram.

İbrahim Cəfərov