Azarkeşlərin möhtəşəm aksiyasından 1 il ötdü

Ötən il bu günü, 2016-cı ilin 6 aprelində futbol klublarının azarkeşlərinin iştirakı ilə “Dördgünlük müharibə”də şəhid olanların ruhuna ehtiram və Azərbaycan ordusuna dəstək məqsədilə möhtəşəm aksiyası keçirilmişdi.

Futbolxeber.az saytının əməkdaşının da iştirak etdiyi aksiy 12:00-da "Elmlər Akademiyası" metro stansiyasının qarşısında başlamışdı.

Aksiya 500-ə yaxın azarkeşin iştirakı ilə start götürmüşdü. Fanatlar “Tribuna oyaqdı, əsgərlərə dayaqdı”, “Azərbaycan əsgəri, vur, keç səngəri”, “Azərbaycan bir olsun, istəməyən kor olsun”, “Ən böyük əsgər, bizim əsgər”, “Qarabağ bizimdi”, bizim olacaq” və s. şüarlar səsləndirmişdilər. Zaman keçdikcə aksiya iştirakçılarının sayı durmadan artmışdı.

Azərbaycan himninin oxunmasından sonra azarkeşlər Şəhidlər Xiyabanının yolunu tutmuşdular. Yol boyu şüarlar səsləndirən fanatların Şəhidlər Xiyabanının qarşısında sayı 3 minə çatmışdı. Xiyabanı ziyarət etdikdən sonra fanatlar Fəvvarələr meydanına üz tutmuşdular və meydanda himnin səslənməsi ilə aksiya başa çamışdı.

Qeyd edək ki, möhtəşəm aksiyada “Bakı”, “Neftçi”, “Xəzər Lənkəran”, “Qarabağ”, “Qəbələ”, “İnter”, “Kəpəz”, “Sector 11” fan-klublarının üzvləri aparıcı qüvvə kimi çıxış etmişdilər.