Şevçenko Bakıya gəlir

"Neftçi" klubu 80 illik yubileyi ilə əlaqədar silsilə tədbirlər keçirməkdə davam edir. Futbolxeber.az saytının məlumatına görə, “ağ-qaralar”ın Azərbaycan Kubokunun yarımfinal mərhələsi çərçivəsində keçiriləcək “Qarabağ”la ilk oyun öncəsi də bu barədə planı var. 

 

Bu barədə klubun rəsmi “Facebook” səhifəsindən bilgi yayılıb. Sizi həmin məlumatla tanış edirik: "Klubumuzun yubileyi ilə bağlı silsilə tədbirlər Azərbaycan kubokunun yarımfinal mərhələsi çərçivəsində keçiriləcək “Neftçi” – “Qarabağ” matçında da davam edəcək. 30 mart 2017-ci il tarixdə təşkil olunacaq görüşü müxtəlif dövrlərdə “Neftçi”nin formasını geyinmuş veteran futbolçular izləyəcəklər. Onlar arasında hazırda ölkəmizdə yaşayan veteran futbolçularla yanaşı, ölkə xaricindən dəvət olunmuş – 1966-cı ilin bürünc medalçısı Nikolay Boqdanov, Olimpiya çempionu İqor Ponomaryov, komandamızın heyətində ən çox oyun keçirmiş futbolçulardan biri Nikolay Smolnikov, 1971-ci ildə SSRİ çempionatında 33 ən yaxşı futbolçu sırasına düşmüş Vitali Şevçenko kimi əfsanəvi simalar da var. 30 mart saat 19:30-da başlanacaq “Neftçi” – “Qarabağ” matçından öncə keçiriləcək tədbirin bədii hissəsində azarkeşlər maraqlı görüntülərə şahidlik edəcəklər. Bu səbəbdən azarkeşlərimizi matça 1 saat qalmış stadiona dəvət edirik. Gəlin 80 ilin həyəcanını birgə yaşayaq!"