Yaşar Seyidov İspaniyadan dəvət aldı

“Bakı”nın icraçı direktoru Yaşar Seyidov Madrid “Atletiko”sundan dəvət alıb. Futbolxeber.az saytının məlumatına görə, İspaniya təmsilçisinin prezidenti Enriko Sereso “Bakı” rəsmisini Çempionlar Liqasının yarımfinal mərhələsinin ilk oyunu çərçivəsində baş tutacaq “Atletiko” - “Bavariya” matçına dəvət edib.

Qeyd edək ki, “Bakı” və “Atletiko” arasında əməkdaşlıq rəsmi şəkildə başa çatsa da, 2 klub rəsmiləri bu gün də sıx ünsiyyət saxlayırlar. Təsadüfi deyil ki, “Barselona” üzərində möhtəşəm qələbədən sonra həm “Bakı” klubunun prezidenti Hafiz Məmmədov, həm də Yaşar Seyidov “Atletiko” rəhbərliyini qələbə münasibəti ilə təbrik ediblər.

Onu da əlavə edək ki, “Atletiko” rəhbərliyi Yaşar Seyidovu təkcə “Visente Kalderon”dakı oyunda deyil, Münhendə “Bavariya”ya qarşı baş tutacaq cavab matçında, eləcə də komanda finala adlayacağı halda, həlledici qarşılaşmada da görmək istədiklərini vurğulayıblar.