“Azərbaycan millisi qrupun ən güclüsüdür”

Futzal üzrə Avropa çempionatının əsas mərhələsində B qrupunun qarşılaşmaları davam edir. Futbolxeber.az-ın məlumatına görə, sözügedən qrupda yer alan Azərbaycan millisi ikinci oyununda Albaniyanı 5:0 hesabı ilə məğlub edib. 

 

Matçdan sonra açıqlama verən məğlub komandanın baş məşqçisi Erind Resuli oyunu belə şərh edib: “Azərbaycan millisi çox güclü rəqibdir. Albaniya yığması indiyə qədər bu mərhələyə yüksəlməyib. İlk dəfədir əsas mərhələdə çıxış edirik. Oyuna gəldikdə, birinci hissədə bərabərsəviyyəli qarşılaşma izlədik. Bir səhv etdik və Azərbaycan millisi bundan faydalandı. Bizim isə azı 2 real qol şansımız oldu. Komandamın fasiləyə qədər daha yaxşı oynadığını düşünürəm. Bu sözləri ikinci hissə haqda deyə bilmərəm. 2-3 ciddi səhv buraxdıq. Hesab 3:0 olduqdan sonra bizim üçün hər şeyin bitdiyi aydınlaşdı. Qələbə münasibəti ilə komandanızı təbrik edirəm. Xüsusilə də qapıçınız çox yaxşı oynadı, ən azı 3-4 epizodda vacib reaksiya nümayiş etdirdi və qol vurmağımıza imkan vermədi. 

 

Fikrimcə, Azərbaycan millisi qrupun ən güclüsüdür. Komandanız kifayət qədər təcrübəli və səviyyəli futzalçılardan qurulub”.