Yazmadığım yazı...

AFFA-da çoxları bizi düşmən gözü ilə görür. Ən yuxarı səviyyədən sıravi işçiyə qədər. Azərbaycan futbolundakı çatışmazlıqları (bu söz çatışmamazlıq deyil), uğursuzluqları qabartdığımız üçün persona non qrata elan olunmuşuq. “Günahımız” məğlubiyyətlərə göz yummağımız, heç-heçələri malalamamağımızdır. İlahi, oyunlarda, mətbuat konfranslarında, tədbirlərdə o baxışları görsəniz... İnsan nə qədər stadionda üzərində düşmən baxışı hiss edər... Feysbukdakı, votsapdakı statuslarımızın skrinləri “lazımi ünvanlar”a gedir. Deyilənə görə, bəzi rəhbər şəxslər feyk profillərlə sosial şəbəkədə dostluq siyahımızda da var...

Bəlkə də dünəndən bu yana tikan üstündə oturublar, düşünürlər ki, dostlarımız heç, görəsən, bizim də daxil olduğumuz “düşmənlər” nə yazacaqlar. Amma özünüzü çox yormayın, narahat olmağa da dəyməz. Dünən oyundan sonra özümə söz verdim – bu milli, AFFA haqda daha heç nə yazmayacağam. Ən azı Millətlər Liqasının sonuna qədər. Bilirsiniz niyə? Çünki dünənki nəticə bir komandanın ola biləcəyi yerin ən dibidir. Öz meydanında Lixtenşteynlə heç-heçədən o tərəfi yoxdur... Baxın və “əsərinizlə” fəxr edin. Bunun adı rəzillikdir, vəssəlam. Qarşıdakı iki matçı qazansanız da, qrup qalibi olsanız da, heç nə dəyişməyəcək. Azərbaycan futboluna vurulan bu ləkəni heç nə silə bilməz!

Bunu da yazım, bitirirəm. Bəlkə də özlüyünüzdə düşünürsünüz ki, biz dünənki heç-heçəyə sevinirik. Əsla! Bilirsiniz niyə? Çünki sizdən fərqli olaraq, biz bu milli ilə böyümüşük. 90-ların sonlarında atamla birgə getdiyim Türkiyə, İsveçrə, daha sonra İtaliya ilə oyunlardan biz bu millinin xəstəsiyik. Uşaqlığımız, yeniyetməliyimiz “Tofiq Bəhramov”da səsimizin batması ilə, “Gənclik”dən “Nərimanov”a piyada getməklə keçib. Biz sizin kimi stadionun yolunu AFFA-da vəzifəyə gələndən sonra tanımamışıq! Sabah siz vəzifədən gedəndən sonra bəlkə də illərlə milli komandamızın nəticələrindən xəbər tutmayacaqsınız. Amma bizim 20, 10 il əvvəl kimi, Allah ömür versə, 10 il, 20 il sonra da bu yığma üçün canımız yanacaq...

Uzun sözün qısası, daha heç nə yazmıram, nə bu milli haqda, nə də AFFA-nın yarıtmaz fəaliyyəti barədə. O siz, o da uçuruma apardığınız Azərbaycan futbolu. Onsuz da bir gün hər kəs öz əməlinə görə cavab verəcək...

İBRAHİM