“Qarabağ”ın Kiyev “Dinamo”su ilə səfər matçının yeri və hakimləri bilindi

“Qarabağ”ın UEFA Konfrans Liqasında Kiyev “Dinamo”su ilə ilk oyununun yeri, vaxtı və hakimləri bəlli olub.

Futbolxeber.az saytının məlumatına görə, avqustun 6-da Polşanın Lublin şəhərindəki eyniadlı stadionda keçiriləcək qarşılaşma Bakı vaxtı ilə saat 21:00-da başlayacaq.

Kiyev təmsilçisi müharibə səbəbindən ev oyunlarını başqa ölkədə keçirir.

Matçı danimarkalı hakimlər briqadası idarə edəcək. Baş hakim Morten Kroq, yan xətt hakimləri Şteffen Bramsen və Viktor Skite olacaq. Dördüncü hakim funksiyasını Yakob Karlsen yerinə yetirəcək. VAR sisteminə Yakb Kelet nəzarət edəcək. Onun köməkçisi isə Yens Maye olacaq.

Qeyd edək ki, komandalar arasında cavab oyunu avqustun 13-də Bakıda təşkil olunacaq.