Riad Rəfiyev Harvardın məzunu oldu

“Sumqayıt”ın prezidenti Riad Rəfiyev Avropa Futbol Klubları (EFC) və “Harvard Business School”un birgə layihəsi olan “Executive Leadership Programme” proqramını uğurla başa vurub.

Futbolxeber.az saytının məlumatına görə, yüksək səlahiyyətli futbol menecerləri üçün nəzərdə tutulan proqram liderlik, strateji qərarvermə və innovativ idarəçilik bacarıqlarının inkişafını dəstəkləyir.

Proqram çərçivəsində iştirakçılar ABŞ-nin Boston şəhərində yerləşən Harvard kampusunda keçirilən intensiv sessiyalarda, həmçinin onlayn dərslərdə və Avropada təşkil olunan yekun mərhələdə iştirak ediblər.

Proqramın mükafatlandırma mərasimi Parisdə, “Park de Prens” stadionunda keçirilib.

Qeyd edək ki, sözügedən proqram EFC və “Harvard Business School”un ilk birgə layihəsidir. İlk tədris prosesində PSJ, “Mançester Siti”, “Çelsi”, “Yuventus”, “Nyukasl”, “Monako”, “Fənərbaxça”, “Betis” və digər Avropa klublarının top menecerləri iştirak ediblər.