Leroy Mikels: “Avrokuboklar uğrunda mübarizə aparmağımız real görünür”

“Hücum xəttində lazımi dərəcədə effektli deyildik. Bu səbəbdən də xal itkisi ilə üzləşdik. Təbii ki, qol vura bilsəydik, qalib gələrdik. Təəssüf ki, alınmadı. Nəticədə ilin son oyununda xal itkisi ilə üzləşdik”.

Futbolxeber.az saytına açıqlamasında bu sözləri “Zirə”nin hücumçusu Leroy Azərbaycan Premyer Liqasının 16-cı turunda “İmişli”yə qarşı keçirdikləri oyun (0:0) barədə danışarkən deyib.

O, ilk dövrədə olduğu kimi, ikinci dövrədə də “İmişli” ilə matçda xal itirmələrinin səbəbini göstərməkdə çətinlik çəkib: “Konkret nəsə səbəb deyə bilmirəm. Futboldur, bəzən alınır, bəzən yox. Təbii ki, müdafiə xəttinə daha çox diqqət ayıran komandalarla görüşlərdə çox qol vəziyyəti yaratmaq olmur. Amma ümumilikdə biz cəhdlərimizi etdik. Sadəcə matç boyu rəqibin arxa xəttini yarmaq cəhdlərimiz nəticəsiz qaldı”.

Almaniyalı forvard geridə qalan 16 turu komandası üçün belə dəyərləndirib: “Hazırda 3-cü pillədəyik. Lakin düşünürəm ki, daha çox xal yığmaq ehtimalımız da var idi. Sadəcə müəyyən matçlarda uğursuzluqla üzləşdik. Ölkə kubokunda da mübarizəni davam etdirəcəyik. Odur ki, avrokuboklar uğrunda mübarizə aparmağımız real görünür. Mövsümün ikinci yarısına çox ciddi hazırlaşacağıq. Əlimizdən gələni edəcəyik ki, yekunda istəyimizə çataq”.

Dünən keçirilən “Zirə” - “İmişli” oyununu stadiondan izləyənlər arasında Leroy Mikelsin dəvət aldığı Ruanda yığmasının baş məşqçisi Adel Amruş da var idi. 25 yaşlı futbolçu bu barədə məlumatlı olduğunu söyləyib: “O, gəlməmişdən əvvəl bizə məlumat vermişdi. Ruanda millisinin üzvlərini meydanda iş başında görmək istəyirdi”.

O, qardaşı, “Sabah”da forma geyən Coy Lenslə birlikdə Ruanda yığmasına dəvət almalarına da münasibət bildirib: “Bildiyiniz kimi, “Zirə”də forma geyən Anji Mutsinzi Ruanda yığmasında yer alır. Mənim nənəm Ruandadadır. Elə buna görə Anji bizi bu yığmaya təklif etmişdi. Hər şey də bundan sonra başladı”.

Mikels yeni il tətilini harada keçirəcəyindən də danışıb: “Almaniyaya gedəcəm. Ola bilsin ki, sonradan Niderlanda da yollandım. Əslində vaxt da çox deyil. Cəmi 10 günümüz var”.