İmad Faraj: “Bu, sizin fikrinizdir, mən son matçlarda yaxşı oynamışam”

“İlk hissədə yaxşı çıxış etmədik. Lakin fasilədən sonra toparlandıq. Yaxşı oyun nümayiş etdirərək, qələbə qazandıq”.

Futbolxeber.az saytına müsahibəsində bu sözləri “Neftçi”nin üzvü İmad Faraj Azərbaycan Premyer Liqasının IX turunda “Qəbələ”ni səfərdə 2:0 hesabı ilə məğlub etdikləri oyun barədə danışarkən deyib.

O, qələbəyə baxmayaraq, oyunlarının elə də uğurlu alınmadığını söyləyib: “Açığı, əvvəlki matçlarda daha yaxşı çıxış etmişdik. “Qəbələ” ilə oyunda, xüsusən də ilk hissədə orta xətdə sərt oynamırdıq. Normalda taktikamız belədir ki, topu itirən kimi dərhal reaksiya verib geri almalıyıq. Lakin bunu bacarmırdıq. Hava şəraiti də təsir göstərirdi. Ardıcıl 2-3 hücumdan sonra özümü yorğun hiss edirdim”.

Faraj “Neftçi”dəki çıxışının uğurlu olmaması fikri ilə razılaşmayıb: “Bu, sizin fikrinizdir, hörmətlə yanaşıram, lakin mən son matçlarda yaxşı oynamışam. Ümumilikdə 3 məhsuldar ötürmə vermişəm və bu göstərici ilə komandada ən çox qol ötürməsi edən futbolçuyam”.

Fransız vinger Vensan Abubakarın “Neftçi”yə gəlişinə də toxunub: “Abubakar çox güclü, səviyyəli futbolçudur. Hücumda məhz belə futbolçuya ehtiyacımız var idi. Debütu çox yaxşı alındı. İnanıram ki, ardı gələcək və qarşıdakı matçlarda da komandaya kömək edəcək”.

26 yaşlı futbolçu növbəti turda qarşılaşacaqları “Kəpəz”lə matçdan da söz açıb: “Bu gün kubok oyunumuz var, daha sonra çempionatda “Kəpəz”lə üz-üzə gələcəyik. Hələ ki liqada ardıcıl iki qələbəmiz olmayıb. Ona görə də “Kəpəz”lə matçda mütləq qalib gəlməliyik. Bunun üçün əlimizdən gələni edəcəyik. İnşallah, istəyimizə çatacağıq”.

Fərəc Aslanov