Saşa İliç: “Hesabda 3:0 öndəsənsə, daha rahat və sadə oynamalısan”

“Mən hər bir oyunda hücumameyilli futbol oynamaq istərdim. Amma reallıq ondan ibarətdir ki, bu, alınan deyil. Çünki Azərbaycan Premyer Liqasında "Qarabağ", "Neftçi" və bir sıra güclü komandalar oynayır. Hər bir komandaya ayrı hazırlaşacağıq. İkinci hissədə oyun cəhətdən bir sıra problemlərimiz oldu. Çalışacağıq ki, bunu növbəti matçlarda aradan qaldıraq”.

Futbolxeber.az saytının məlumatına görə, bu sözləri “Sumqayıt”ın baş məşqçisi Saşa İliç Azərbaycan Premyer Liqasının ilk turunda "Kəpəz"i 3:0 hesabı ilə məğlub etdikləri oyundan sonra deyib.

Serb mütəxəssis daha sonra jurnalistlərin suallarını cavablandırıb:

- İkinci hissədə hesabı artıra bilmədiniz. Bu hesabdan irəli gələn rahatlıq idi, yoxsa fiziki problemlə bağlı idi?

- Fiziki problemlə bağlı olduğuna inanmıram. Çünki ikinci hissədə biz bir neçə əvəzetmələr etdik və yeni oyunçular meydana daxil oldu. Əslində, mən problemi oyunçuların fərdi səhvlərində görürəm. Adlarını çəkmək istəmirəm, amma hesabda 3:0 öndəsənsə, daha rahat və sadə oynamalısan. Lakin bəzi oyunçular bunu dərk eləmir. Bəzi hava mübarizələrində səhvlər oldu. Təbii ki, Ninkoviç və Keffel tam hazır deyil. Ona görə də biz bu əvəzetmələri edirik ki, oyunçular komandaya tam uyğunlaşa bilsinlər.

- Növbəti tur "Qarabağ"la oynayacaqsınız. Bildiyiniz kimi, Ağdam klubu Çempionlar Liqasında Macarıstan səfərindən qayıdacaq. Bunu "Sumqayıt" üçün üstünlük saymaq olarmı?

 - "Qarabağ"ı Azərbaycanın ən güclü klubu kimi görürəm və onların avrokuboklardakı oyunlarını da izləyirəm. "Ferensvaroş"la matç onlar üçün çətin olacaq, amma bizim üçün liqadakı matç baxımından bunun üstünlük olub-olmaması barədə bir söz deyə bilmərəm. Həmin matçda bu gün etdiyimiz kimi səhvlər etsək, bu, bizim üçün yaxşı qurtarmayacaq.

 - Ayxan Süleymanlı iki epizodda komanda hücuma keçərkən geriyə oynadı və bundan sonra onu əvəz etdiniz. Burada olduğunuz müddətdə azərbaycanlı futbolçuların mentalitetini dəyişə bildinizmi?

- Ayxanı oyunçu kimi bəyənirəm. İlk hissəni yaxşı oynasa da, fasilədən sonra hissədə bəzi səhvlər etdi. Mənim onunla söhbətim də oldu. Təbii ki, gələcəkdə inkişaf emək istəyirsə, bu səhvləri etməməlidir.