Rüfət Abdullazadənin menecerindən Firuz Abdullaya minnətdarlıq

Xəbər verdiyimiz kimi, “Səbail”in futbolçusu Rüfət Abdullazadə karyerasını ölkə xaricində davam etdirəcək. 24 yaşlı yarımmüdafiəçi Xorvatiyanın “Varazdin” klubu ilə müqavilə bağlamaq üzrədir.

Futbolxeber.az saytının məlumatına görə, Abdullazadənin meneceri Emil Əsədov sosial şəbəkə hesabında bununla bağlı paylaşım edib. O, futbolçu ilə “Səbail” arasındakı müqaviləyə artıq xitam verildiyini bildirib. Əsədov ölkə xaricində çıxış etməsi üçün şərait yaradan “Səbail” rəhbərliyinə təşəkkür edib:  

“Şəxsən “Səbail”in icraçı direktoru Firuz Abdullaya, eləcə də digər rəhbər heyətinə danışıqlar zamanı göstərdiyi peşəkar yanaşma və dəstəyə görə təşəkkürümü bildirirəm.

Rüfət isə artıq futbol həyatında yeni səhifələr açmağa hazırdır və gələcək uğurlarını gözləyirik.

“Səbail”ə keçmişdəki əməkdaşlıq üçün təşəkkür edir, gələcək oyunlarında uğurlar arzu edirəm”.  

Xatırladaq ki, son günlər Rüfət Abdullazadənin adı müxtəlif klublarla yanaşı çəkilsə də, “Səbail” rəhbərliyi alqışlanası addım ataraq daha çox pul qazanmağı yox, futbolçunun gələcəyini seçdi. Belə ki, istər yerli klublar, istərsə də ölkə xaricindən təklif göndərən aşağı liqa təmsilçiləri futbolçu üçün daha yüksək təzminat məbləği ödəməyə razı olsalar da, “Səbail” Xorvatiya klubunun yüksək liqada oynamasını, Abdullazadə üçün bu variantın daha perspektivli olmasını nəzərə alaraq, futbolçusunu daha aşağı məbləğdə satmağa razı olub.

Xatırladaq ki, peşəkar karyerasına 8 il əvvəl “Sumqayıt”da başlayan Rüfət Abdullazadə 2023-cü ildən “Səbail”də çıxış edirdi.