Veşoviç: “Artıq “Qarabağ”da darıxırdım, yeni motivasiyaya ehtiyac duyduğumu hiss etdim”

“Qarabağ”ın sabiq futbolçusu Marko Veşoviç Ağdam klubundakı karyerasından danışıb.

Futbolxeber.az saytının məlumatının görə, ölkəsinin “Vijesti” nəşrinə müsahibəsində 33 yaşlı futbolçu Ağdam klubundan gedişini belə şərh edib:

“Qarabağ”da dörd uğurlu və gözəl il keçirdim. Çətin idi. Çünki klubun ambisiyaları hər mövsüm artırdı, lakin həm yerli çempionatda, həm də Avropa arenasında keyfiyyət və nəticələr göz önündə idi. Dörd dəfə çempion olduq, demək olar ki, eyni sayda “qızıl dubl” etdik, Avropa Liqasının 1/8 finalında “Bayer”lə qarşılaşdıq”.

Veşoviç qeyd edib ki, "Bayer"ə qarşı oyunu uzun müddət xatırlayacaqlar: "Təəssüf ki, hər iki oyunda əlavə dəqiqələrdə buraxdığımız qollara görə mərhələni keçə bilmədik. Klub böyüdükcə mən də oyunçu kimi inkişaf etdim. Amma artıq darıxırdım. Yeni motivasiyaya ehtiyac duyduğumu hiss etdim və yoluma davam etməyə qərar verdim. Klubdakı hər kəsə minnətdaram və onlara uğurlar arzulayıram".