“Şamaxı” - “Araz-Naxçıvan” oyununu “CBC Sport” yox, bu kanal yayımlayacaq - EKSKLÜZİV

Azərbaycan Premyer Liqasının 35-ci turu çərçivəsində keçiriləcək 5 oyunun hamısı televiziya vasitəsi ilə canlı yayımlanacaq.

Futbolxeber.az saytının əldə etdiyi məlumata görə, “CBC Sport” tərəfindən canlı yayımlanmayacaq “Şamaxı” - “Araz-Naxçıvan” oyununu azarkeşlərə “İdman TV” təqdim edəcək.

Çempionatın yayım hüququ “CBC Sport”da olsa da, Peşəkar Futbol Liqasının (PFL) sayəsində bu matç istisna kimi “İdman TV”yə həvalə olunub.

Xatırladaq ki, mayın 17-də Premyer Liqamızda 3 oyun eyni vaxtda (17:00) başlayacaq. “CBC Sport” kanalı bu matçlardan ikisini - “Zirə” - “Sabah” və “Sumqayıt” - “Turan Tovuz” görüşlərini azarkeşlərə təqdim edəcək. Kanalın texniki imkanları, üstəlik, VAR sistemi eyni gündə yalnız iki matçı canlı yayımlamağa imkan verir. Belədə əvvəlcədən “Şamaxı” - “Araz-Naxçıvan” oyununun PFL-in yutub kanalı vasitəsi ilə yayımlanması nəzərdə tutulmuşdu.

Çempionatın təşkilatçısı kimi PFL Şamaxıdakı görüşün də canlı yayımlanması üçün xeyli səy göstərib və yekunda istəyinə çatıb. Beləliklə, PFL-in sayəsində mayın 17-də keçiriləcək hər 3 matç azarkeşlərə televiziya vasitəsi ilə canlı təqdim olunacaq.

Xatırladaq ki, “Şamaxı” ilə səfər matçında “Araz-Naxçıvan” uduzmayacağı halda, “Sumqayıt” - “Turan Tovuz” görüşünün nəticəsindən asılı olmayaraq üçüncü yeri təmin edəcək.