Elvin Bədəlov: “Ola bilər, prinsipiallıq məşqçilər arasındadır, bizə aidiyyəti yoxdur”

“Sumqayıt”ın müdafiəçisi Elvin Bədəlovun Futbolxeber.az saytına müsahibəsi

- Azərbaycan Premyer Liqasının son turunda “Araz-Naxçıvan”a 0:2 hesabı ilə uduzdunuz. 3 turdan sonra alınan məğlubiyyəti nə ilə əlaqələndirmək olar?

- Oyuna pis başladıq. İlk 10 dəqiqədə çətinlik çəkdik. Bu səbəbdən də qapımızda erkən qol gördük. Hesabda geri düşdükdən sonra özümüzə gəldik. “Araz-Naxçıvan” yaxşı komandadır. Onlara nəinki 2, hətta 1 qol vurmaq belə çətindir. Nə qədər çalışsaq da, heç cür fərqlənə bilmədik. Ola bilər hamı oyuna tam köklənməmişdi. Bu da çıxışımıza təsir etdi.

- Bir ara “Sumqayıt” təhlükəli zonaya yaxın idi. Lakin 3 oyunda 7 xal toplamaqla demək olar ki, komandanız Premyer Liqada qalmağı təmin etdi. Ola bilərmi ki, bundan sonra artıq komandada arxayınlıq yaranıb? Yaxud motivasiya qalmayıb?

- Düzdür, bu məqamın da bir qədər təsiri var. Amma heç cür arxayınlaşmaq olmaz. 2-3 oyun uduzsaq, yenə o təhlükəni yaşaya bilərik. Ona görə də bütün matçlara ciddi yanaşmaq lazımdır.

- Bu gün “Şamaxı” ilə üz-üzə gələcəksiniz. Səfərdəki son oyundan sonra baş məşqçilər mətbuat konfrasında bir-birilərinə atmaca atmışdılar. Həmin məqam bugünkü görüşün prinsipiallığını artırır?

- Ola bilər prinsipiallıq məşqçilər arasındadır. Ayxan müəllimi tanıyıram. Onunla birgə işləmişik. İndi də Vaqif müəllimlə işləyirik. İnanmıram ki, nəsə ciddi bir problem olsun. Nə olubsa, bizə aidiyyəti yoxdur. Biz həmişəki kimi meydana qələbə üçün çıxacağıq. Evdə oynayırıq, qalib gəlmək istəyirik.

- Qış transfer pəncərəsi zamanı “Qarabağ”a keçəcəyiniz haqda xəbərlər yayılmışdı. Bu məsələ artıq qapanıb? Yoxsa yayda yenidən müzakirə olunacaq?

- Qış transfer pəncərəsi zamanı söhbət elə söz-söhbət yaranmışdı. Deməzdim tam qapanıb. Sadəcə indi dəqiq nəsə demək çətindir. Yayda çox şey ola bilər.

- Hətta belə fikirlər səslənirdi ki, sizin “Qarabağ”a keçidinizə legioner limitinin də təsiri ola bilər. Artıq məlumdur ki, limit ləğv edilib. Bu məqam transferə əngəl ola bilər?

- Necə olacağını bilmirəm. Limit oldu-olmadı, mənə fərqi yoxdur. Yay transfer pəncərəsini gözləyirəm. Orada vəziyyətə baxacağıq.

- “Sumqayıt”da qalmaq ehtimalınız var?

- Təbii ki, ilk növbədə “Sumqayıt”ın təklifinə baxacağam. Uzun illərdir burada forma geyirəm. Yox, əgər alınmasa, o zaman digər təklifləri nəzərdən keçirəcəyəm.

- Millinin son toplanışından kənarda qaldınız. Fernandu Santuşdan dəvət gözləyirdiniz?

- Bu mövsüm komanda olaraq yaxşı çıxış etmirik. Belədə milliyə dəvət almaq çətindir. Düzdür, bizdən yığmaya çağırılanlar oldu. Mən də hər zaman çalışıram, millidən dəvət gözləyirəm. Ola bilər bir qədər stabillik çatışmır. İstənilən halda qərarı baş məşqçi verir və mən də ona hörmətlə yanaşıram.

İbrahim Cəfərov