Media sektor, yoxsa karvansara?

Dünən Azərbaycan Premyer Liqasının 27-ci turu çərçivəsində keçirilən “Sabah” - “Zirə” (1:1) oyununda bir neçə neqativ hal yaşandı. Əslində, başqa vaxt olsaydı, bunlara göz yummaq olardı. Amma nəzərə alaq ki, bir neçə gündən sonra Azərbaycan milli komandası tarixində ilk dəfə bu stadionda - “Bank Respublika Arena”da meydana çıxacaq.

Əvvəla, ondan başlayaq ki, Masazır stadionunda media sektor adlanan yer həqiqətən də mətbuat nümayəndələri üçün ayrılıb? Çünki dünənki matçı media sektorda izləyənlərin arasında jurnalist olmayanlar jurnalistlərdən daha çox idi. Media sektorda kimlər yox idi ki: klub rəsmisi, menecer... Bəli, yanlış oxumadınız. Şəxsən mənim sağ tərəfimdə ilk hissədə menecer əyləşmişdi. Görəsən, bomboş stadionda başqa yer tapılmır ki, “Sabah”ın rəsmiləri, yaxud menecerlər gəlib görüşü media sektordan izləyirlər?

Bu, “Sabah”la bağlı ilk belə hal deyil. Bir neçə tur əvvəl “Sabah”ın məşqçisi də səfərdə “Səbail”lə görüşdə media sektorda lövbər salmışdı. Nəticədə ilk 45 dəqiqədə onun qışqırtılarına dözmək məcburiyyətində qaldıq. Yalnız bu sətirlərin müəllifinin fasilədə Peşəkar Futbol Liqasına və “Səbail”ə müraciətindən sonra “Sabah”ın məşqçisi media sektordan uzaqlaşdırılmışdı. Lakin dünən Masazırda təkcə media sektor deyil, miks zona da karvansara təsiri bağışlayırdı. Hər kəs rahat şəkildə miks zonaya daxil olub, jurnalistlərin işinə mane olurdu. Biri gəlib müsahibə verməyən hazırlaşan Ceyhun Nuriyevin qolundan tutub “2 dəqiqəlik bura gəl, sonra müsahibə verərsən" deyir, bir başqası Umarali Raxmonaliyevin qolundan yapışıb onu aparır və jurnalistin sualı cavabsız qalır. Başa düşmək olmur, biz jurnalistlər istər media sektora, istərsə də miks zonaya daxil olmamışdan əvvəl vəsiqələrimizi yoxlayan stadionunun mühafizə əməkdaşları digər şəxslərin mediaya aid olan zonalara rahat şəkildə keçməsinə necə göz yumur???

Dünən Masazırdakı xoasdan əziyyət çəkən təkcə jurnalistlər deyildi. Belə ki, matçdan sonra məlum oldu ki, “Zirə”nin futbolçularının yuyunması üçün isti su yoxdur. Belədə məcburən futbolçular tərli vəziyyətdə geyinib stadionu tərk etdilər. Görəsən, biz hansı dövrdə yaşayırıq? Elə bil 2025-ci il yox, 90-cı illərin Əhmədlisi, Günəşlisidir, isti su tapılmır...

Yuxarı da qeyd etdiyimiz kimi, əslində başqa vaxt olsaydı, bütün bunlara bəlkə də göz yummaq olardı. Lakin nəzərə almaq lazımdır ki, martın 25-də Azərbaycan milli komandası “Bank Respublika Arena”da Belaruslə üz-üzə gələcək. Eyni hallar Belarus millisi ilə matçda da təkrarlansa, necə olacaq? Bu baş verərsə, Belarus, Rusiya mətbuatının Azərbaycan haqda nələr yazacağını təsəvvür etmək çətin deyil... Ümid edək ki, martın 25-nə kimi bütün çatışmazlıqlar aradan qalxacaq və AFFA və “Sabah” Azərbaycanı biabır etməyəcək.

İbrahim Cəfərov