Santuşun zamanı qabaqlamaqlığı

Dünən AFFA-nın əməkdaşlıq etdiyi saytlarda millimizin baş məşqçisi Fernandu Santuşun Əvəzedicilər Liqasının 23-cü turu çərçivəsində keçirilən "Neftçi-2" - "Qarabağ-2" matçını stadiondan canlı izlədiyi barədə xəbər tirajlandı. Portuqaliyalının Premyer Liqanın və I Liqanın matçlarından sonra əvəzedicilər çempionatının oyunlarını da canlı izləməyə başlaması müsbət məqam kimi oxucalara sırındı.

Kimsə düşünə bilər ki, halaldır Santuşa, gör işinə necə məsuliyyətlə yanaşır ki, hətta əvəzedicilərin də oyunlarını izləyir. Əslində isə bu, özünü gözəsoxmaqdan başqa bir şey deyil. Məgər Santuş Əvəzedicilər Liqasından kimisə milliyə dəvət edəcək? Təbii ki, yox. "Neftçi"nin, "Qarabağ"ın əvəzedicilərində özünü yaxşı tərəfdən göstərən bir gün qabaq “Neftçi Arena”da olardı...

Əvəzedicilər Liqasının oyunlarına baxar U-17-nin, U-19-un, cəhənnəm U-21-in baş məşqçisi. Bir halda ki, millinin çalışdırıcısı Əvəzedicilər Liqasından kimisə milliyə dəvət etməyəcəksə, oyuna baxmağın, bunu camaatın gözünə soxmağın mənadı nədir? Guya işləyirik təsəvvürü yaratmaq?

Amma bir tərəfdən də düşünürəm ki, cənab Santuşa qarşı haqsızlıq edirəm. Bəlkə həqiqətən də Əvəzedicilər Liqasından milliyə oyunçu dəvət edəcək? Niyə də yox?! Nəzərə alaq ki, gələn il Azərbaycan Premyer Liqasında legioner limiti ləğv olunacaq və azərbaycanlı futbolçular ehtiyat oyunçular skamyasında özlərini günə verəcəklər. O halda millimizin baş məşqçisi də məcbur qalıb əvəzedicilər Liqasından milliyə futbolçu dəvət edə bilər. Bəlkə də Santuş zamanı qabaqlayıb...

İBRAHİM