Rövşən Nəcəfin vədi yalan çıxdı...

Ötən ilin mayında AFFA prezidenti Rövşən Nəcəfin idman jurnalistləri ilə qeyri-rəsmi görüşü keçirildi. SOCAR-ın binasında baş tutan həmin görüşdə Rövşən bəy birbaşa olmasa da, dolayısı yolla idman mətbuatına dəstək olmaq istədiyini bildirdi. Sirr deyil ki, böyük pulların dövr etdiyi Azərbaycan futbolunda təəssüf ki, maddi baxımından ən aşağı təbəqə məhz mediadır. Məsələn, bu gün sıravi futbolçu ayda 5 min manat qazanırsa, idman mətbuatının böyük hissəsinin aylıq qazancı 4 rəqəmli məbləğə çatmır. Buna görə də Rövşən bəyin təşəbbüsü çox xoş qarşılandı. Həm də daha öncə buna bənzər layihə AFFA-nın əvvəlki rəhbərliyi tərəfindən də həyata keçirilmişdi. Konkret desək, AFFA-nın sabiq baş katibi Elxan Məmmədovun təşəbbüsü ilə yaradılmış Media Komitəsi tərəfindən müxtəlif layihələrin icrasına görə ayın sonunda assosiasiya tərəfindən saytlara aylıq 500 manat civarında vəsait ödənilirdi. Düzdür, Rövşən Nəcəflə görüşdə bəziləri elə danışdılar ki, sanki həmin vaxt AFFA mediaya pul ödəmirdi, əksinə, mediadan pul alırdı. Hər nə qədər qəribə olsa da, həmin vaxt Elxan Məmmədovun sağ əli olan Sərxan Hacıyev ağzına su alaraq oturdu və “əslində elə olmayıb”, “düz demirsiniz” və s. fikirlər səsləndirməməklə hazırkı AFFA prezidentində düzgün informasiyanın formalaşmasına cəhd etmədi, amma hazırda mövzumuz o deyil. Uzun sözün qısası, AFFA prezidenti ilə həmin görüşdən sonra idman mediasında bir ümid yarandı. Əksəriyyət səbirsizliklə növbəti görüşü gözləməyə başladı. Çünki Rövşən bəy bildirdi ki, maksimum 1 ay ərzində bu tip növbəti görüş baş tutacaq və orada bu məsələ daha dəqiq, daha konkret şəkildə müzakirə olunacaq.

Gəl ki, həmin görüşdən təxminən 8 ay keçsə də, AFFA-dan xəbər-ətər yoxdur. Lakin sən demə, biz belə düşünürmüşük. Əslində isə 15-20 gün əvvəldən bəziləri artıq hərəkətə keçib. Düzdür, budəfəki danışıqlar prosesində assosiasiyanın prezidenti Rövşən Nəcəf iştirak etməyib. Amma böyük ehtimalla, göstəriş məhz Rövşən bəy tərəfindən verilib. Çünki inanmırıq ki, icraçı vitse-prezident Sərxan Hacıyev Rövşən bəyin icazəsi və xəbəri olmadan mətbuat xidmətinə bir qrup saytla əməkdaşlıqla bağlı danışıqlar aparmaq tapşırığı versin. Təbii ki, hər kəs istədiyi media qurumu ilə əməkdaşlıqda sərbəstdir. Kim kimə reklam verir, özü bilər. Sadəcə indiki məqamda məsələ Rövşən Nəcəfin vədinin yalan çıxmasıdır. Axı AFFA prezidentinin media ilə görüşündə fərqli söhbət olmuşdu. Bildirilmişdi ki, növbəti dəfə bu məsələ yenidən qaldırılacaq, assosiasiya birbaşa deyil, hansısa media təşkilatının vasitəçiliyi ilə mətbuata dəstək olacaq. Bəs indi nə dəyişdi, Rövşən bəy? Yaxud sizin AFFA-nın əməkdaşları əməkdaşlıq edəcəkləri saytları hansı kriteriyaya uyğun müəyyənləşdiriblər? Yoxsa hər şey tipik Azərbaycan variantında olub - ancaq dost-tanış? Göründüyü kimi, suallar çoxdur, cavab isə təəssüf ki, yoxdur. İnanıram ki, Rövşən bəyin media ilə ilk görüşündə təkcə biz deyil, “12-liy”ə düşməyən digər saytlar da AFFA prezidentinə bu barədə sual ünvanlayacaq. Ən azı ayrı-seçkiliyin səbəbi hamıya maraqlıdır... 

FUTBOLXEBER.AZ