Bir əldə 3 “qarpız” - QEYD

O gün “Araz-Naxçıvan”ın məşqini izləyirdim. Buzovna stadionunun qazonu kənardan yaxşı təsir bağışlasa da, yaxından baxanda görürsən ki, o qazonda nəinki futbol oynamaq, məşq etmək, hətta qaçmaq belə risklidir. Hər an ayağın burxula bilər. Lakin Naxçıvan klubunu qınamaq da olmur. Məcburiyyətdən komanda məşqlərini orada keçirir. Yoxsa kim istər ki, hər an zədə riski olan meydançada hazırlıq keçsin...

Xeyli müddətdir Bakıda stadion çatışmazlığı müşahidə olunur. Əksər komandalar məşq üçün meydança tapmaqda çətinlik çəkirlər. Adicə bir nümunə. Bu gün “Araz-Naxçıvan” yoxlama oyununda “Səbail”lə üz-üzə gələcək. Qarşılaşmanın yeri yalnız matçın startına 1 sutkadan az qalmış məlum oldu...

Bu gün Premyer Liqada çıxış edən 10 klubdan dördü - “Neftçi”, “Zirə”, “Səbail” və “Sabah” Bakını təmsil etsə də, məcburiyyətdən “Qarabağ” və “Araz-Naxçıvan” da paytaxtda məskunlaşıb. Elə “Turan Tovuz” da çox vaxt məşqlərini Bakıda keçirir. Bu 7 klubdan “Qarabağ”, “Neftçi” və “Sabah”ın məşq etmək üçün meydança baxımından problemi yoxdur. Ağdam klubu “Azərsun Arena”da, “Neftçi” isə öz bazasında rahat hazırlığını keçir. “Səbail”in məşqlərinə də oyunlarını keçirdiyi “ASCO Arena” ev sahibiyi edir. “Zirə”, “Turan Tovuz”, “Araz-Naxçıvan”ın isə işi zülmdür. Məşq üçün gəzmədikləri stadion qalmır. Son zamanlar “Zirə”nin dadına “Azərsun Arena” çatır. “Araz-Naxçıvan” isə girişdə qeyd etdiyimiz kimi, Buzovna stadionunda lövbər salıb.

Stadion baxımından bəxti gətirən yeganə komanda “Sabah”dır. Hazırda rəhbərliyi AFFA-da da əsas söz sahibi olan Masazır klubunun ixtiyarında düz 3 arena var. Onlardan biri komandanın ev oyunlarını keçirdiyi Masazır stadionudur. “Sabah” məşqlərini Şüvəlandakı keçmiş adı ilə “AZAL Arena”da da keçir. Xeyli müddət diqqətdən kənarda qalan sözügedən arena da neçə vaxtdır “Sabah”ın balansındadır. Eynən daha çox “Şəfa” adı ilə tanınan stadion kimi. “Keşlə”nin “Şamaxı”ya “çevrilməsindən” sonra uzun müddət “yiyəsiz” qalan arena da “Sabah”ın ixtiyarındadır. Bu halda ortaya maraqlı sual çıxır. Digər klublar məşq etməyə meydança tapmadığı halda nə üçün üç stadion birdən “Sabah”ın ixtiyarına verilib? Bu anda yada məşhur “I əməliyyatı” filmindəki “sementzavod ya, poqruzka uqlya ya, xlebzavod ya, ya, ya...” səhnəsi düşür... Bu nə stadion aclığıdır, ay “Sabah”?..

İBRAHİM