U-17 millimiz Yunanıstana uduzdu

17 yaşadək futbolçulardan ibarət Azərbaycan milli komandası bu gün Avropa çempionatının seçmə mərhələsində ikinci oyununu keçirib.

Futbolxeber.az saytının məlumatına görə, 6-cı qrupda yer alan millimiz Yunanıstan yığması ilə üz-üzə gəlib.

Matç Azərbaycan millisinin məğlubiyyəti ilə başa çatıb.

Qeyd edək ki, İlham Yadullayevin baş məşqçisi olduğu U-17 ilk oyunda da Macarıstana 0:4 hesabı ilə məğlub olmuşdu.

16 noyabr

Yunanıstan (U-17) - Azərbaycan (U-17) - 3:0

Qollar: Stavros İoannu, 47, Konstantinos Souvlatzis, 59, Kristos Kapellas, 71

Baş hakim: İon Orlic (Moldova)

"Tunari" stadionu

Qrupun digər matçında Macarıstan və Rumıniya milliləri qolsuz heç-heçəyə razılaşıblar.

Bu nəticələrdən sonra Yunanıstan 6 xalla qrup lideridir. Macarıstan 4 xalla ikinci, Rumıniya isə 1 xalla üçüncüdür. Azərbaycan yığması xalsız və qrup sonuncusudur. Artıq növbəti mərhələ şansını itirən millimiz son matçında noyabrın 19-da Rumıniya ilə üz-üzə gələcək.