“Araz-Naxçıvan” məşqləri bərpa edib

“Sumqayıt”la oyundan sonra Azərbaycan Premyer Liqasında yaranmış fasilədən istifadə edərək 3 gün istirahət edən “Araz-Naxçıvan” məşqlərini bərpa edib.

Futbolxeber.az saytının məlumatına görə, dünən Buzovna qəsəbə stadionunda həyata keçirilən 90 dəqiqəlik məşqə bərpa prosesini davam etdirən Vadim Abdullayev, Ramin Nəsirli və Karlos Jatoba, eləcə də milli komandanın düşərgəsində olan Mustafa Əhmədzadə, Moldova yığmasına yollanan qapıçı Kristian Avram qatılmayıb.

Əvəzində “Neftçi” ilə görüşdə zədələnən, bu səbəbdən “Zirə” və “Sumqayıt”la matçları buraxan Bəxtiyar Həsənalızadə komanda ilə çalışmalara qoşulub.

Qeyd edək ki, “Araz-Naxçıvan” milli komandanın oyunları ilə əlaqədar yaranmış fasilədən sonra noyabrın 22-də, Tovuz şəhər stadionunda “Kəpəz”lə üz-üzə gələcək.