Toral Bayramov: “Əla qol idi”

“Qarabağ”ın müdafiəçisi Toral Bayramlının Futbolxeber.az saytına müsahibəsi

- Azərbaycan Premyer Liqasının beşinci turunda “Zirə”ni 3:1 hesabı ilə məğlub etdiniz. Qazanılan qələbəni necə şərh edərdin?

- Çətin oyun olacağını bilirdik. Yaxşı hazırlaşmışdıq matça. “Zirə” son mövsümün gümüş medalçısıdır. Üstəlik, bu mövsümə də yaxşı başlayıblar. Düzgün oynadıq, baş məşqçinin verdiyi tapşırıqları yerinə yetirdik və qalib gəldik.

- Zaqreb “Dinamo”suna məğlubiyyətdən sonra bu görüşə hazırlaşmaq psixoloji cəhətdən çətin olmadı?

- Deməzdim psixoloji təsir elədi. Mövsüm ərzində oyunlar çox olur. Biz hər dəfə başa çatan matçı unudub, digərinə köklənirik. Çalışacağıq yolumuza davam edək.

- Vurduğun qol sanki bir qədər gözlənilməz oldu. Həmin anı necə təsvir edə bilərsən?

- Mən tez-tez başla qol vurmuram. Ola bilər ona görə qəribə görünsün.  Fikrimcə, əla qol idi.

- Qarşıdakı saatlarda millinin düşərgəsinə qoşulacaqsınız. İlk dəfə milli komandamız Fernandu Santuşun rəhbərliyi altında toplaşacaq. Gözləntilərin nədir?

- Santuş millimizdə yenidir. Buna baxmayaraq, böyük məşqçidir, Avropa çempionudur. İnanıram ki, hər şey yaxşı olacaq. İlk toplanışımızdar. Əlimizdən gələni edəcəyik. Ola bilər yeniliklər çox olsun. İstənilən halda vəzifəmiz məşqçinin tapşırıqları yerinə yetirmək.

- İsveç və Slokivakiya oyunlarda neçə xal qazansaq, bu, uğurlu nəticə hesab ediləcək?

- Bu barədə oyundan sonra danışarıq.

- Fernandu Santuş mətbuat konfransında bildirdi ki, fiziki baxımdan hansısa dəyişiklik etməyə imkanı yoxdur. Futbolçular klublarında necə hazırlıq keçiblərsə, elə də olacaq. Sanki portuqaliyalı mütəxəssis bu fikirlə özünü gələcəkdəki mümkün uğursuzluqdan sığortaladı...

- Bu, məşqçinin fikridir. Mənim bunu şərh etməyim düzgün çıxmaz.

İbrahim Cəfərov