Mikels: “Bu, “Şamaxı” üçün yaxşı nəticədir, amma biz 2 xal itirdik”

“Oyuna yaxşı başladıq. 2:0 hesabı ilə önə keçmişdik. Ola bilər ki, bir qədər arxayınlaşdıq. Nəticədə də qələbəni əldən verdik”.

Futbolxeber.az saytına açıqlamasında bu sözləri “Sabah”ın hücumçusu Coy Lens Mikels Azərbaycan Premyer Liqasının ilk turunda “Şamaxı” ilə heç-heçə (2:2) oynadıqları görüşü şərh edərkən deyib.

O, Konfrans Liqasının oyununda çox güc itirdiklərini bildirib: “Asan qollar buraxdıq. Ola bilər bunda yorğunluğun da rolu var. Çünki “Makkabi”yə qarşı 120 dəqiqəlik ağır oyun keçirmişdik. Həmin matçda çox güc itirmişdik. Bu, “Şamaxı” üçün yaxşı nəticədir, amma biz 2 xal itirdik”.

Almaniyalı futbolçu hazırda diqqətlərini "Sent-Patriks Atletik"lə oyuna yönəltdiklərini söyləyib: “Artıq “Şamaxı” ilə matçı unutmalıyıq. Çünki bizi qarşıda çətin səfər oyunu gözləyir. İrlandiya klubu güclüdür. Üstəlik, öz meydanlarında çıxış edəcəklər. Buna baxmayaraq, əlimizdən gələni edəcəyik ki, səfərdə uğurlu çıxış edək, yenə də azarkeşlərimizi sevindirək”.  

Mikels ölkə çempionatının ikinci turunda “Zirə”yə qarşı keçirəcəkləri matça da toxunub: “Düzdür, indi bu barədə düşünmürük. Yalnız onu deyə bilərəm ki, bizim kimi “Zirə” də Konfrans Liqasının oyunu çərçivəsində səfərə yollanacaq. Üstəlik, “Makkabi” ilə görüşdən fərqli olaraq bu dəfə 120 deyil, 90 dqiqə oynayacağıq. Ona görə də “Zirə” ilə matça daha hazırlıqlı olacağıq”.

Fərəc Aslanov