Şahin Diniyev: “Hər məşqçiyə Firuz Abdulla kimi rəhbər arzulayıram”

Son günlər ölkə mətbuatında “Səbail”də daxili çəkişmələr olduğu barədə məlumatlar yayılıb. İddia olunur ki, baş məşqçi Şahin Diniyev klubun icraçı direktoru Firuz Abdulla və idman direktoru Zamiq Hüseynovdan narazıdır, hətta onlardan klub prezidentinə şikayət edib.

Məsələyə aydınlıq gətirmək üçün Şahin Diniyevə müraciət etdik.

Futbolxeber.az saytına açıqlamasında təcrübəli mütəxəssis yayılan xəbərlərin gülünc olduğunu bildirdi.

O qeyd etdi ki, “Səbail”də olan mehribançılıq heç bir kollektivdə yoxdur: “Firuz Abdullanın necə təmiz insan olduğunu istər mətbuatdakılar, istərsə də daha əvvəl onunla çalışan hər kəs çox yaxşı bilir. Bu cür iddialar gülüncdür. Hər məşqçiyə Firuz Abdulla kimi rəhbər arzulayıram. Mənim Firuz Abdulla və Zamiq Hüseynovdan hər hansı bir narazılığım yoxdur. Bircə gün komandanın içində olsanız, özünüz hər şeyi görəcəksiniz. İnanmıram ki, “Səbail”də olan mehribançılıq hansısa klubda olsun. Ümumiyyətlə, karyeramda belə rəhbərliklə işləməmişəm”.  

Şahin Diniyev əlavə edib ki, bu cür xəbərlər “Səbail” üçün əhəmiyyətsizdir: “Qəsdən bu cür xəbərləri yayanlar düşünməsinlər ki, bizə təzyiq göstərə bilərlər. Əsla! Bu cür xəbərlər bizə toxunmur. Kimin nə yazmasının bizim üçün heç bir əhəmiyyəti yoxdur. “Səbail” öz yoluna davam edir. Belə xəbərlər bizə hər hansı təsir göstərə bilməz. Biz öz işimizlə məşğuluq”.