Junior Martins: “Zirə”dəki ilk oyunumda qol vurmaq xoş hisslər yaratdı”

“Zirə”nin yeni transferlərindən olan Junior Martinsin Futbolxeber.az saytına müsahibəsi

- Artıq 2 həftəyə yaxındır “Zirə”nin düşərgəsindəsiniz. Adaptasiya necə keçir, artıq yeni komandaya tam öyrəşə bilmisiniz?

- “Zirə”də olduğum üçün xoşbəxtəm. Buradakı komanda yoldaşlarım və məşqçilər heyəti tərəfindən olduqca istiqanlı qarşılandım. Adaptasiya prosesi çox yaxşı gedir.

- “Kəpəz”dən fərqli olaraq “Zirə”nin məqsədi Premyer Liqada qalmaq deyil. Junior Martins özünü iddialı komandada isbatlamağa hazırdı?  

- “Zirə” Azərbaycanın böyük klublarından biridir. Bura gəlməkdə məqsədim var. “Zirə”də tarix yazmaq və titullar qazanmaq istəyirəm. Hara gəldiyimi bilirəm. Biz komanda olaraq hər bir turnirdə daim döyüşmək istəyindəyik. Çempion olmağa, bu hissləri burada yaşamağa hazıram.

- Təlim-məşq toplanışı çərçivəsində artıq 2 yoxlama oyunu keçirmisiniz. Bu görüşlərdə komanda özünü necə göstərdi?

- İki yoldaşlıq görüşü keçirmişik. Bu, komanda üçün olduqca yaxşıdır. Mənə görə Rəşad Sadıqov kimi bir məşqçinin oyun üslubuna öyrəşmək, onun rəhbərliyi altında oynamaq olduqca vacibdir.

- Ümumiyyətlə, hazırlıq prosesinin gedişatını necə dəyərləndirirsiniz?

- Məşqlərimiz səmərəli keçir. İndidən deyə bilərəm ki, biz mövsümə 100 faiz, kompakt şəkildə hazır olacağıq.

- “Orenburq”la matçda qeyri-rəsmi də olsa, “Zirə”də qol hesabını açdınız. Azarkeşlər eyni performansı ilk rəsmi görüşdə də görə biləcəklər?

- "Zirə"dəki ilk oyunumda qol vurmaq xoş hisslər yaratdı. Azarkeşlərimiz mənim bu formada daha çox qollarımı görəcəklər. Onlara sevinc bəxş etmək üçün buradayam.

- Avroliqanın startına elə də çox qalmayıb. “Şerif”lə mübarizədə şansları necə dəyərləndirirsiniz?

- Bu matça hazırlaşmağa təxminən 2 həftə vaxtımız qalıb. "Şerif"ə qarşı keçirəcəyimiz matçlara köklənmişik. İnanıram ki, hər iki oyunu qələbə ilə sonlandıracağıq.

- Cütün favoriti göstərilən “Şerif”in kağız üzərindəki üstünlüyünü meydanda əks etdirməməsi üçün “Zirə” daha çox hansı məqamlara fikir verməlidir?

- Bəli, çoxları Moldova təmsilçisinin favorit olduğunu deyir. Amma mənə görə bu cütdə favorit yoxdur. Bizi qarşıda iki gərgin görüş gözləyir. Biz mərhələni keçmək uğrunda 100 faiz gücümüzü göstərməyə hazırıq.

- Yəqin hazırda davam edən hər iki böyük turniri izləyirsiniz. Avropa çempionatı daha maraqlıdı, yoxsa Amerika kuboku? Hər iki turnirdəki favoritləriniz hansı komandalardır?

- Hər iki turnir nəhəng, güclülərin mübarizə apardığı yarışlardandır. Orada ulduz, istedadlı gənc oyunçular çıxış edir. Hər bir turniri izləyirəm və mənə görə onları müqayisə etmək düzgün deyil. Belə yarışların nə qədər çətin olduğunu dərk edirəm. Mənim azarkeşlik etdiyim komandalar Amerika kubokunda Braziliya, AVRO-2024-də isə Portuqaliya millisidir.

Azad NURİYEV