AFFA “sıfırlandı” - QEYD

Bu günlərdə Azərbaycan Futbol Federasiyaları Assosiasiyası (AFFA) və “Carlsberg Azerbaijan” şirkəti arasında əməkdaşlıq müqaviləsi imzalanıb.

Müqaviləyə əsasən, “Xırdalan 0.0” alkoqolsuz pivəsi əsas milli komandanın sponsoru olub.

Məlum olduğu kimi, aprelin əvvəlində AFFA rəhbərliyində ciddi dəyişikliklər baş verdi. Son 16 ildə assosiasiyaya rəhbərlik edən Rövnəq Abdullayev postunu Rövşən Nəcəfə təhvil verdi. İcraiyyə Komitəsinin heyəti böyük ölçüdə dəyişildi. Eləcə də bir zamanlar Elxan Məmmədovun köməkçisi olan Sərxan Hacıyev baş katib kimi, icraçı vitse-prezident vəzifəsində də sabiq rəhbərinin xələfi oldu.  

Bütün bu dəyişikliklərdən təxminən 1 ay sonra AFFA-nın “Xırdalan 0.0”la müqavilə imzalamasında da hardasa simvolik çalarların olduğunu demək mümkündür. Bu seçimdə hardasa subliminal mesaj var. Görünür, AFFA tezliklə sıfırlanmaya doğru gedəcək. Böyük ehtimalla, kadr siyasətində yeniliklər olacaq. Belə demək mümkünsə, yeni rəhbərlik hər şeyə sıfırdan başlamağa cəhd edəcək.

Amma və lakin unutmaq olmaz ki, hər şeyin sıfırlanmasının təhlükəli tərəfləri də var. Çünki sıfır mövqeyindən asılı olaraq, olduğu mühitdə bir çox dəyişikliklərə səbəb olur. O mənada ki, sıfır hər hansı rəqəmin qarşısında olsa, bu, prosesin geriyə doğru getdiyinin göstəricisi olacaq. Yox, sıfır hər hansı rəqəmdən sonra gəlirsə, bu, inkişafın və böyümənin göstərici hesab edilə bilər. Odur ki, AFFA-nın “sıfırlanmasının” hansı nəticələrə gətirib çıxaracağını zaman göstərəcək...

İbrahim CƏFƏROV

P.S. AFFA-da “sıfırlanma” yolunda ilk addım artıq atılmaq üzrədir. Az sonra assosiasiyadakı yeni təyinat barədə Futbolxeber.az saytında oxuya bilərsiniz...